Жабайы пілмен кездейсоқ кездесу полицейдің өмірін қиды

Үндістанның Ассам штатында жабайы піл түнгі патруль кезінде полицейді таптап өлтірді. Қайғылы оқиға Гоалпарадағы батальон лагерінің аумағында болған, деп хабарлайды Tengri Travel The Times Of India басылымына сілтеме жасап.

Пілдің шабуылы

Полицияның мәліметінше, оқиға өткен демалыс күндері болған. Қаза тапқан адам - Дакурвитадағы Ассам полициясының 17-батальонында қызмет еткен Амзад Али. Ол бекетке оралып бара жатқанда, жалғыз жүрген пілге кезігіп қалған. Жануар ер адамға шабуыл жасап, оны таптап тастаған.

Али ауыр жарақат алып, ес-түссіз қалды. Ол Шахид Нидханурам атындағы азаматтық ауруханаға жеткізілген, алайда дәрігерлер оның келген бойда қайтыс болғанын растады. Оқиға кезінде патрульде жеті полиция қызметкері болған.

Кейінірек желіде адамды таптап өлтірді делінген жабайы пілдің кадрлары пайда болды. Видеода оның түнде тұрғын ауданда емін-еркін жүргені көрінеді.

БАҚ мәліметінше, Гоалпарада бірнеше жылдан бері адамдар мен пілдер арасындағы қақтығыс тоқтамай тұр. 2021 жылы шабуылдар салдарынан 20-ға жуық адам, 2022 жылы 28 адам қаза тапқан. 2023 жылдың қарашасына қарай тағы кем дегенде 13 адам құрбан болса, 2024 жылы Лакхипур ауданында болған бөлек оқиғаларда жас жұбайлар мен тағы бір ауыл тұрғыны қайтыс болған.

Google News арқылы жаңалықтарымызды қадағалаңыз