Угандадағы лай көшкіні 9 адамның өмірін қиды

Жергілікті биліктің хабарлауынша, апат қатты жаңбыр салдарынан болған. Себей шағын ауданында бірнеше үйді су басып, лай көшкен. Үш бала Букво округінде, тағы 6 бала көрші Квин округінде қайтыс болды.

Жергілікті басшы Джудит Челангат түнгі сағат 3-тер шамасында апат туралы хабар берілгенін айтты.

— Олар маған «Каптанг ауылының тұрғындары көшкін салдарынан көз жұмды. Көмекке келіңіз» деді. Жолдасымды оятып, оқиға орнына жедел жеттік, — деді ол.

Челангат табиғи апаттан кейін қирандылар көп екенін жеткізді.

— Адамдардың айқайлағанын естідік, бірақ біз оларға жете алмадық, құтқара алмадық. Таңғы сағат 5 шамасында көмек сұрағандарға жеткенше, ол үйдің ішіндегілер қаза тапты. Көрші үйдегі екі адам аман қалды, өйткені олар қашып үлгерген, — деді Джудит Челангат.

Уганда Қызыл Крестінің қызметкерлері мәйіттер мен заттарды алу үшін қалың балшықты қазып жатқан тұрғындарға қосылды.

— Лай барлық жерді жайлап кеткен, бірде-бір үй балшықтан көрінбеді. Біраз жұмыстан кейін мәйіттерді алып шықтық. Үш отбасы зардап шекті, 6 адам қайтыс болды, тағы 4-уі ауыр жарақат алып, қазір ауруханада жатыр, — деді Қызыл Крест қызметкері Мосес Чечо. 

Сондай-ақ көшкін Капчорва-Суам жолындағы көлік қозғалысын тоқтатты. Бұл жерде SIT көпірі су тасқынының астында қалған. Толассыз жауған жаңбыр мен нашар жол жағдайы төтенше жағдайлар қызметінің шалғай аудандарға қатынауына кедергі келтірді.

Жергілікті билік, Уганда Қызыл кресті және қауымдастық мүшелері жоғалған тұрғындарды табу және қоныс аударған отбасыларға көмектесу үшін бірлесіп жұмыс істеді. Каптанг ауылының дрондық кадрлары ауыл шаруашылық жерлері балшыққа толы екенін және қирау кезінде үйлердің іздері ғана көрінетінін көрсетті.

Соңғы жылдары ормандардың кесілуі мен жауын-шашынның көп түсуіне байланысты болған табиғи апат Уганданың таулы аймақтарының климаттық көшкіндерге осалдығын көрсетті.

Былтыр осы елде болған көшкіннен 14 адам қаза тапқан болатын.