Жабық есік жағдайында өткен кездесуде Си Цзиньпинді ұлы көшбасшы деп атады

Aikyn.kz сауда соғысын тоқтатқысы келген екі елдің басшыларының кездесуін bbc.com сайтының материалына сүйеніп талдайды.

Ұзақ күтілген кездесу 1 сағат 40 минутқа созылып, президент кестесіндегі жоспарланған уақыттан көп болған. АҚШ президенті Дональд Трамп пен Қытай Халық Республикасының төрағасы Си Цзиньпин Оңтүстік Кореяның Пусан қаласында кездесті. Бұл – Трамптың екінші президенттік мерзіміндегі Қытай басшысымен алғашқы жеке жүздесуі. 

Трамп журналистерге берген сұхбатында кездесуді «керемет өтті» деп сипаттап, Си Цзиньпинді «ұлы көшбасшы» деп атаған. Ол кездесуді 10 балдық шкала бойынша 12 балға лайық деп бағалаған. Президенттің айтуынша, АҚШ барлық қытайлық тауарларға салынған тарифтерді төмендетеді. Ал Қытай АҚШ-қа фентанил компоненттерін экспорттауды тоқтатады. Сонымен қатар Қытай америкалық сояны қайта импорттап, сирек кездесетін металдарға қойылған шектеулерді алып тастамақ.

Трамп сәуір айында Қытайға ресми сапармен баруды жоспарлап отырғанын да мәлімдеген. Оның сөзінше, Тайвань мәселесі талқыланбаған, алайда Украина жөнінде тараптар «бірлесе жұмыс істеуге» уағдаласқан.

BBC экономикалық шолушысының пікірінше, бұл кездесу Трамптың айқын жетістігі болған жоқ. Ол бастапқыда Қытаймен сауда соғысын қатал шарттармен бастағанымен, 9 ай өткен соң бітімге келу үшін жеңілдік беруге мәжбүр болды. Сарапшының айтуынша, Трамп Қытайдан елеулі экономикалық немесе саяси жеңілдіктер ала алмаған және тарифтерді төмендету арқылы өз ұстанымын әлсіреткен.

Си Цзиньпин келіссөздерде тең дәрежеде, тіпті кей жағдайда үстем позицияда болған. Осылайша, Қытай АҚШ пен Батыстың әлсіз тұстарын анықтап, тарифтердің өз экономикасына нақты зиян келтірмегенін көрсетті. 

Трамп үшін бұл кездесу мазмұннан гөрі сыртқы әсер мен символикалық жетістікке көбірек ұқсады. Ол сәуірге дейін Қытаймен қарым-қатынасты ушықтырмауға мүдделі. Сондықтан Украинадағы соғысқа қатысты АҚШ пен Қытай арасында ешқандай қатаң санкциялық шаралар қабылданбайтыны болжанып отыр.

Кездесу жабық есік жағдайында өткен. Америкалық тараптан мемлекеттік хатшы Марко Рубио, сауда өкілі Джеймисон Грир, қаржы министрі Скотт Бессент, сауда министрі Ховард Латник және Қытайдағы АҚШ елшісі Дэвид Пердью қатысқан. Қытай делегациясының құрамында сыртқы істер министрі Ван И, оның орынбасары Ма Чжаосюй және ҚХР Мемлекеттік кеңесінің вице-премьері Хэ Лифэн болды.

Кездесудің қарсаңында Трамп Truth Social платформасында АҚШ-тағы ядролық сынақтарды қайта бастау туралы жазба жариялап, Қытайды тікелей атап өтті. Оның айтуынша, бұл шешім «басқа факторлармен байланысты». Алайда АҚШ әлі де ең қуатты ядролық арсеналға ие екенін ұмытпаған жөн.

Кездесу сырттай сәтті өткенімен, нақты нәтижелер АҚШ пайдасына шешілмеді. Трамп экономикалық қысымды әлсіретіп, саяси әсерге көңіл бөлуге мәжбүр болды. Ал Қытай өз позициясын сақтап қалды.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.