Жалақы кешіктірілуде: Қазақстанда қайда шағымдануға болады және өсімпұлды қалай алуға болады

Жалақы белгіленген мерзімде түспесе, қызметкер не істеуі керек және қайда жүгінуі қажет? Қазақстанның Еңбек және халықты әлеуметтік қорғау министрлігі төлем кешіктірілген жағдайдағы іс-қимыл тәртібін түсіндірді. Tengrinews.kz өз құқығыңызды қалай қорғап, берешекті ғана емес, тұрақсыздық айыбын да қалай алуға болатынын баяндайды.

Жалақы қашан төленуі керек?

Еңбек кодексіне сәйкес, жалақы айына кемінде бір рет және келесі айдың бірінші онкүндігінен кешіктірілмей төленуі тиіс. Нақты күні еңбек немесе ұжымдық шартта көрсетіледі.

Егер төлем күні демалыс немесе мереке күндеріне сәйкес келсе, қаражат бір күн бұрын аударылуы керек.

Сондықтан бірінші қадам - келісімшарта жалақы төлеудің қай күні көрсетілгенін тексеру.

Жалақының кешігуіне қатысты қайда шағымдануға болады?

Егер белгіленген мерзім өтіп кетсе, ал ақша түспесе, алдымен жұмыс берушіге хабарласып, өтінішті тіркеген жөн.

"Мәселе шешілмесе, жұмыскер жұмыс берушінің тұрған жеріндегі ҚР Еңбек және халықты әлеуметтік қорғау министрлігі Мемлекеттік еңбек инспекциясы комитетінің аумақтық департаментіне жүгінуге құқылы. Өтінішті eOtinish жүйесі арқылы электрондық форматта да жіберуге болады", - деп хабарлады Еңбек министрлігі.

Шағымға қандай құжаттарды қоса беру керек?

Өтінішке еңбек қатынастарын және берешектің бар екенін растайтын құжаттарды қоса берген дұрыс: еңбек шарты, есеп айырысу парақшалары, банктен үзінді көшірмелер, бұйрық және басқа да құжаттар.

Жалақының кешігуіне байланысты тұрақсыздық айыбы: үстінен қанша төленуі тиіс

Жалақы кешіктірілген жағдайда жұмыс беруші берешекті өтеп, кешіктірілген кезең үшін тұрақсыздық айыбын төлеуге міндетті.

Еңбек министрлігінің мәліметінше, тұрақсыздық айыбы төлемнің белгіленген мерзімінен кейінгі күннен бастап, есеп айырысқан күнге дейін әрбір күнтізбелік күн үшін есептеледі. Оның мөлшері міндеттеме орындалған күні қолданыста болған Ұлттық банктің базалық мөлшерлемесінің 1,25 еселенген мөлшері негізінде есептеледі.

Еңбек инспекциясы не істей алады?

Мемлекеттік еңбек инспекциясы қызметкерлердің еңбек заңнамасын бұзу туралы өтініштерін қарастырады және негіз болған жағдайда заңда қарастырылған шараларды қабылдайды.

Атап айтқанда, берешек расталған жағдайда, жұмыс беруші қызметкер алдындағы қарызын өтеуі тиіс.

Жалақыны кешіктіргені үшін айыппұл қарастырылған

Жалақыны белгіленген мерзімде төлемегені, сондай-ақ жұмыс берушінің кінәсінен тұрақсыздық айыбының есептелмеуі мен төленбеуі үшін әкімшілік жауапкершілік көзделген.

Әкімшілік құқық бұзушылық туралы кодекстің 87-бабына сәйкес айыппұл мөлшері келесідей:

лауазымды тұлғалар үшін - 30 АЕК (2026 жылы 129 750 теңге); шағын кәсіпкерлік субъектілері немесе коммерциялық емес ұйымдар үшін - 60 АЕК (259 500 теңге); орта кәсіпкерлік субъектілері үшін - 100 АЕК (432 500 теңге); ірі кәсіпкерлік субъектілері үшін - 150 АЕК (648 750 теңге).

Тағы оқыңыз: Қазақстандықтарға туған күнінде ақылы демалыс берілуі мүмкін

Бізді Google-дың негізгі дереккөздер тізіміне қосыңыз

Қосу