Жамбыл облысында екі айда 27 жасөспірім жүктілігі тіркелді

Ана мен бала денсаулығын қорғау бөлімінің басшысы Айжан Терлікбаеваның айтуынша, тіркелген жағдайлардың ішінде 16 жасқа толмаған қыздар жоқ.

– 2026 жылдың қаңтар-ақпан айларында өңірде жасөспірімдер арасында 27 жүктілік фактісі тіркелді. Өткен жылдың осы кезеңімен салыстырғанда көрсеткіш төмендеді. 2025 жылы осы уақытта 44 жағдай болған, – деді ол.

Мамандардың мәліметінше, жүктіліктің басым бөлігі 16-17 жастағы қыздар арасында кездеседі. Бұл санатта 23 жағдай тіркелген. Тағы 4 жағдай 18-19 жастағы, ресми некеде тұрған қыздарға қатысты.

Талдау нәтижесі бойынша, жүкті болғандардың едәуір бөлігі – колледж студенттері. Атап айтқанда, 12 қыз орта арнаулы білім алып жатыр, біреуі жоғары оқу орнында оқиды, тағы бірі кешкі мектепте білім алады. Жеті қыз мектеп бітіргеннен кейін еш жерде оқымайды.

Сонымен қатар екі жағдай өңірге басқа қалалардан келген қыздар арасында тіркелген.

Денсаулық сақтау басқармасының мәліметінше, облыста жастарға арналған сегіз денсаулық орталығы жұмыс істейді. Онда жасөспірімдер психолог, гинеколог және басқа да мамандардан аноним түрде кеңес ала алады.

Сондай-ақ жыл сайын жасөспірімдерге скрининг жүргізіліп, дәрістер, тренингтер және ата-аналармен кездесулер ұйымдастырылады.

– Ерте жүктілік анықталған жағдайда әрбір жағдай жеке қаралады. Дәрігерлер, психологтар және әлеуметтік қызметтер бірге жұмыс істейді, – деді Айжан Терлікбаева.

Айта кетейік, Жамбыл облысында мүмкіндігі шектеулі әр төртінші бала білім алмай отыр.