Жамбыл облысында жыл басынан бері 795 өрт тіркелді

Алдын ала есеп бойынша, келтірілген материалдық шығын 90 млн теңгеден асқан. Оқиғалардың басым бөлігі жеке сектордағы үйлерде болған. Өрт салдарынан жарақат алғандар да, қайтыс болғандар да бар. Төтенше жағдайлар департаментінің инспекторлары облыс бойынша күн сайын алдын алу рейдтерін өткізіп, тұрғындарға өрт қауіпсіздігі ережелерін түсіндіріп жүр. 

Биыл Жамбыл облысында 800-ге жуық үй отқа оранды. Бұл өткен жылмен салыстырғанда 16 пайызға көп. Салдарынан жарақат алғандар саны да екі есеге көбейген. Тілсіз жаудан 14 адам уланып, бесеуі қаза болды. Өрттің тұтануына, көп жағдайда ескі электр сымдарының қысқа тұйықталуы мен пешті дұрыс пайдаланбау себеп. 

Дархан Иманәлиев, Жамбыл электр желілері мекемесінің маманы:

- Қазір қытайлық қысқа толқынды пеш, одан кейін жаңадан қойылып жатқан жылытқыш, кондиционердің бәрін бұрынғы ескі тоқтың үстінен қосып пайдалана береді. Соның себебінен өрт жағдайлары болып жатыр. Біздің қалалық бөлімге келіп, өтініш жазып бағанадан түскен сымды уақытылы ауыстырды. Мысалы, бұрын 6 тұрса, 16, 25 қойсын, қазір мүмкіндік бар ғой. Соны уақытылы ауыстырып отырса, өрт жағдайы болмайды.

Қайғылы жағдайдың алдын алу мақсатында Төтенше жағдайлар департаменті күнделікті рейд ұйымдастырады. Ақпараттық акцияларда еріктілер мен электр, газ саласының мамандары тұрғындарға өрт қауіпсіздігі, улы газдан сақтану жолдарын түсіндіреді. Сонымен қоса жылыту маусымында үш мыңға жуық улы газға қарсы датчиктер орнатпақ. 

Дархан Қалдырбек, Облыстық Төтенше жағдайлар департаментінің басқарма бастығы:

- Жылыту маусымына дайындық кезеңінде жалпы саны Жамбыл облысында 450 улы газдан қорғау датчиктері орнатылды және де жергілікті органдардан әлеуметтік осал топқа жататын отбасылардың тізімін алып, қажеттілігіне байланысты осы үйлерге аталған датчиктер орнатылып жатыр. 

Перизат Сейсенбекова, қала тұрғыны:

- Кез келген тұрғын қауіпсіздікке қарау керек. Датчикті орнатқаны дұрыс болды. Түнде әрбір адам сезбейді ғой. Түнде қорықпай бала-шағамызбен жатамыз енді, шиқылдаса, оянып. Өзіміз қоймайтын едік қой. Қазір келіп, барлығын айтып, түсіндіріп тегін қойып жатыр. Сіздерге рақмет!

Бүгін мобильді топ өкілдері Қайнар, Ақжол және Тастақ тұрғын алабтарын аралап, тұрғындарға қауіпсіздік талаптарын түсіндірді. Рейд барысында мамандар 600-ге жуық үйге кіріп, бірқатар техникалық ақауларды анықтады. Кейбір үйдің мұржасы тазаланбаса, енді бірінің пешінде жарықша бар, ал кейбірінде желдету жүйесі жоқ. «Осындай олқылықтарды байқаған жағдайда, уақыт созбай маманға жүгінген жөн. Бұл — оқыс жағдайдың алдын алудың ең тиімді жолы», — дейді мамандар.

Авторлары: Мерей Бает, Бақытжан Бапаев