Жамбыл облысында қайтарылған активтер есебінен 15 ауылға су жеткізілді

Жамбыл облысында қайтарылған активтер есебінен 15 ауылға таза ауыз су жеткізілді.  

Қазір 7 нысанда құрылыс аяқталып, елдімекендер орталықтандырылған желіге қосылды. Шу, Жамбыл, Талас, Байзақ, Қордай және Сарысу аудандарының шалғай ауылдарын сапалы сумен қамтылды. 

Байзақ ауданындағы Төрткүл ауылында таза ауыз су болмаған.  Тұрғындардың біразы ауладан құдық қазып алса, қалғаны тасып ішкен. Биыл бұл проблема шешілді. Су мұнарасы мен екі ұңғыма қазылып, 240 текше мертлік резервуар орнатылды. Енді тұрғындарға тәулік бойы тіршілік нәрі беріледі.

Олжас Сапарбек, Төрткөл ауылының тұрғыны:

- Әркім өз ауласынан қазып отыратын. 5-6 метрден таза су емес қой ол. Соны ішіп отырдық. Енді қазір міне 160 метрден шығып жатыр таза су. Фильтрмен. Енді Алла қаласа кіргіземіз онай.

Мейіржан Ысқақов, мердігер компания өкілі:

- Бар нысандар бұл жерде қосалқы қосымша жабдықталған. Яғни электр тогы сөнген жағдайдың өзінде мұнда өзінің автономды генераторы орналасқан. Қазіргі стандартқа сәйкес бактерацидтік сүзгі орналастырылған. Сол арқылы осы ауыл азаматтарына сапалы ауыз сумен қамтамасыз етіледі.

15 елді мекенге  таза су жеткізу үшін 15,4 млрд теңге бөлінді. Бұл қаражатқа су станцияларының құрылысы жүргізіліп, ауылішілік желілер тартылды.  Жамбыл ауданындағы Қызылшарық, Жаңаөткел және Жұма ауылдары да сапалы сумен қамтылғандар қатарында. Таластағы Қараой ауылында да таза су барды. Шалғайдағы Шығанақ, Мыңарал және Құмөзек стансаларында, сондай-ақ Мойынқұм, Биназар және Бірлік ауылдарында  желі жүргізіліп жатыр. Одан бөлек қайтарылған қаражатқа 4 ауылда медициналық пункт салынды.

Нариман Торабеков, облыс прокурорының аға көмекшісі:

- Ағымдағы жылдың маусым айында  Қордай ауданында Үлкен Сұлутөр  ауылында дәрігерлік амбулатория ашылды. Ол ауылда 1959 жылдан бері денсаулық сақтау саласында нысан болмаған. Жамбыл облысында соғылып жатқан әлеуметтік нысандардың құрылысы Жамбыл облысы прокуратурасының бақылауында тұр. 

2025 жылы  облыста Президент тапсырмасына сәйкес елді мекендерді 100% ауыз сумен қамту жоспары бекітілді. Жалпы үкімет республика бойынша қайтарылған қаражат есебінен әлеуметтік маңызы бар 420-дан астам жобаны қаржыландыруды мақұлдады.

Мерей Бает, Тимур Сейілхан, Елдар Байділдә