Жамбыл облысында жаңа нысан жарамсыз болып қалды

Жамбыл облысының Сарысу ауданында 2 жыл бұрын салынған  су тарату стансасы кәдеге жарамай тұр.

Ұңғымадан шыққан су ащы -дейді ауылдықтар. Тоғызкент тұрғындары қазір тіршілік нәрін көрші ауылдан тартылған ескі құбырдан алып отыр. Өткен ғасырда жүргізілген құбырдың суы да сапасыз. 

2 мыңнан аса тұрғыны бар Тоғызкент аудан орталығынан шалғай  жатыр. 2023 жылы елді мекенге орталықтандырылған ауыз су желісін жүргізу үшін бюджеттен 377 млн теңге бөлінді. Сол жылы құрылыс басталып, кешен 2024 жылы пайдалануға берілді. Алайда ауылдықтар ауыз судың ащы екенін байқап, өздері тәуелсіз сараптамадан өткізген.

Мешітбек Жолдасов, ауыл тұрғыны:

- Ащы болғаннан кейін іше алмайсың, удай. Содан кейін амал жоқ бәріміз ақша жинап, Таразға апарып өзіміз тексертіп келсек, жарамсыз болып шықты. Енді босқа далада қалды.

Жергілікі билік ұңғыма суының ащы екенінен біледі. Жоба бойынша тұщытуға арналған мембраналар да  қойған. Алайда құрылғылар бірінен соң бірі істеп шығыпты. Халық  тұзды суды тұтынудан түбегейлі бас тартқаннан кейін жауаптылар көршілес  ауылдың маңынан жаңа ұңғыма қазған. Осылайша, Тоғызкентті көрші елді мекенен келетің ескі құбырға қосқан. Бірақ мәселе түбегейлі шешілмеді. 

Нұрлан Исмаилов, ауыл тұрғыны:

- Әбілдә ауылы осы жерден 7 шақырым жерде орналасқан. Сол жерде «Чугунный» құбыры бар. Оның ішінің бәрін тат басып кеткен. Арасының бәрі шылау. Бізге жаңадан құдық қазылған, құдыққа соны қосып береміз деген еді. Ауылға жіберген құбырдың диаметрі 30-дай. Ол су 2 мың адамға қайдан жетеді?

Ал жауаптылар 377 млн теңге зая кетті деген уәжбен келіспейді. Себебі 270 млн теңгеге ауылішілік желі жүргізіліп, жұрт пайдаланып отыр. Енді қайта қаржы бөліп көрші ауылдан келетін құбырды жаңартып бермек.

Дәуренбек Шалбаев, Сарысу аудандық ТҮКШ бөлімінің басшысы:

- Чугунның құбырының қызмет көрсету мерзімі 100 жыл. Біз енді оны жоққа шығарып отырған жоқпыз. Иә, ішінде жүрген сайын жер асты құмның суымен ілесіп шығады, құммен де бітеліп жатқаны бар шығар. Жаңадан қазылған құдықтың басына павильионын қойып береміз. Бактерияға қарсы құрылғыны орнатамыз. Сөйтіп екі ортаға 6 шақырым құбыр тартып, осы ауылдың суын тоқтатпай үздіксіз беріп отырамыз. Оны 2026 жылдың бірінші жарты жылдықта бітірсек деп отырмыз.

Су нысанын жоғары аудиторлық палата өкілдері де тексерген. Сөйтіп қаржыны тиімсіз пайдаланған деген қортындыға келіпті. Аудан билігі енді жаңа нысанды консервациялау туралы шешім қабылдап отыр.

Авторлары: Мерей Бает, Елдар Байділдә