Жаңа Конституцияның қабылдануына орай рақымшылық: қанша адам бостандыққа шықты

Нияз Рыспаевтың айтуынша, бүгінгі таңда соттарға 10 мыңға жуық ұсыныс жолданған. Оның 4400-ге жуығын қылмыстық-атқару жүйесі мекемелері, ал 6900-ден астамын пробация қызметтері дайындаған.

"Бүгінгі таңда соттар мыңнан астам материалды қарады. Нәтижесінде қылмыстық-атқару жүйесі мекемелерінен 620 адам босатылды. Бостандыққа шыққаннан кейін бұл азаматтарға әкімшілік қадағалау белгіленеді. Сондай-ақ пробация қызметінің есебінде тұрған тағы 724 азамат жазасын одан әрі өтеуден босатылды. Бұдан бөлек, 730-дан астам сотталған адамның жаза мерзімі қысқартылды", – деді ол.

Оның айтуынша, жергілікті әкімдіктермен бірлесіп, бостандыққа шыққан азаматтарды жұмысқа орналастыру, құжаттарын қалпына келтіру, әлеуметтік және құқықтық көмек көрсету шаралары қабылданып жатыр.

2026 жылғы 6 мамырда Санжар Әділов рақымшылық қандай санаттағы сотталғандарға қолданылмайтынын айтқан еді.

2026 жылғы 1 шілдеде Президент Қасым-Жомарт Тоқаев ауқымды рақымшылық туралы заңға және оған ілеспе заңдарға қол қойды.