Қазақстанда рақымшылық бойынша 2 мыңнан астам адам бостандыққа шықты

Конституцияның 30 жылдығына орай жарияланған рақымшылық (амнистия) бойынша қылмыстық-атқару жүйесі мекемелерінен 2 мыңнан астам адам босатылды, деп хабарлайды Arasha.kz ҚР ІІМ Қылмыстық-атқару жүйесі комитетінің (ҚАЖК) баспасөз қызметіне сілтеме жасап.

«Ішкі істер министрлігінің Қылмыстық-атқару жүйесі комитеті Конституцияның 30 жылдығына орайластырылған рақымшылықты іске асырудың аяқталғанын хабарлайды. Жүргізілген жұмыстардың нәтижесінде соттар 15 970 ұсынысты қарады. Қылмыстық-атқару жүйесі мекемелерінен 2 мыңнан астам адам босатылды, олардың арасында әйелдер мен кәмелетке толмағандар бар», — делінген хабарламада.

Соттар 11 мыңнан астам сотталған адамның жаза мерзімін қысқартты. Пробация қызметінің есебінде тұрған тұлғаларға қатысты материалдарды қарау аясында 2 888 адам жазасын өтеуден толық босатылса, 7,6 мыңнан астам адамның жаза мерзімі азайтылды.

«Рақымшылық әртүрлі санаттарды қамтыды: кәмелетке толмағандар, балалы әйелдер, жүкті әйелдер, мүгедектер және қарт адамдар. Заң пенитенциарлық жүйеге түсетін салмақты азайтуға және әлеуметтік әділеттілікті қолдауға көмектесті», — деп атап өтті ҚАЖК өкілдері.

Бостандыққа шыққандардың барлығы пробация қызметінің тұрақты бақылауына алынып, полицияда жеке есепке қойылғаны баса айтылды.

«Босатылған адамдар үшін қоғамға бейімделу мен ресоциализацияға бағытталған кешенді қолдау қарастырылған. Бұл жұмыс аясында азаматтарға жұмысқа орналасуға көмек, әлеуметтік және психологиялық қолдау, сондай-ақ сұрақтары бойынша кеңестер беріледі», — деп толықтырды комитеттегілер.

Хабарланғандай, рақымшылық жемқорлық, экстремистік және террористік қылмыстар жасаған, сондай-ақ кәмелетке толмағандардың жыныстық тиіспеушілігіне қарсы қылмыс жасағандарға, азаптау қолданғандарға және рецидивистерге қолданылмады.