Жаңа өндірістік нысандарға бірден 1 трлн теңге көлемінде инвестициялар тартылады Үкімет

- Атап айту керек, азаматтарымыздың табыс деңгейінің артуы экономиканың өсу қарқынына сәйкес келмеді. Еңбекақының жалпы ішкі өнімдегі үлесінің көрсеткіші шамамен 30%-дан асып тұр, бұл – Орталық Азияда жоғары көрсеткіш. Бірақ біздің мақсатымыз – әлемдік орташа көрсеткішке – 40%-ға жету. Жалақының өсу қарқыны бизнес табысының, оның ішінде өз күшімен әрі мемлекеттік қолдау есебінен алынған табыс динамикасынан артта қалып отыр. Осыған орай Үкімет халықтың табысын арттыру үшін кешенді шараларды әзірлеп жатыр, - деді О. Бектенов.

Оның айтуынша, осының аясында қаржылық, салықтық және басқа да ынталандыру шаралары көзделген. Олар еңбекақыны көтеруге, лайықты жалақы төлейтін жұмыс орындарын көбейтуге, кәсіби дағдылар мен біліктілікті дамытуға, сондай-ақ азаматтар үшін қаржылық жүктемені азайтуға бағытталған.

- Өткен жылы Сіз Қазақстан халқына Жолдауыңызда экономиканың барлық саласына озық технологиялар мен жасанды интеллектіні енгізу және цифрлық ел болу міндетін қойдыңыз. Алайда бұл бағытта іске асыру жұмыстары тиісті деңгейге жеткен жоқ. Экономиканың нақты секторында цифрландыру процестері әлі де бастапқы сатыда. Әлі күнге дейін салалық деректер қорлары толық қалыптаспай отыр. Осы және басқа да мәселелер «Digital Qazaqstan» стратегиясында шешімін табуға тиіс. Рұқсат етсеңіз осы тақырып бойынша менің орынбасарым Жасұлан Мәдиев жан-жақты баяндайтын болады. Экономиканың қол жеткізілген өсу жылдамдығы инфрақұрылымды озық қарқынмен дамытуды талап етеді. Дегенмен, арнайы экономикалық аймақтардың өзінде инфрақұрылыммен орташа қамтамасыз ету деңгейі небәрі 53%-ды, ал индустриялық аймақтарда бұл көрсеткіш 48%-ды құрайды. АЭА мен ИА-ны инфрақұрылыммен 100% қамтамасыз ету үшін қажетті шешімдер қабылданды. Алдағы үш жыл ішінде Ислам Даму Банкі қаражатын тарту есебінен жаңа өндірістік нысандарға қажетті инфрақұрылым салуға бірден 1 трлн теңге көлемінде инвестициялар тартылатын болады, - деді Үкімет басшысы.

Айта кетейік, Астанада Мемлекет басшысы Қасым-Жомарт Тоқаевтың төрағалығымен Үкіметтің кеңейтілген отырысы өтіп жатыр.