Жаңа Салық кодексі экспорттаушыларға ҚҚС қайтаруды оңайлатады

2026 жылдан бастап жаңа Салық кодексі аясында экспорттаушылар үшін қосылған құн салығын (ҚҚС) қайтару рәсімі жеңілдетіледі, деп хабарлады Мемлекеттік кірістер комитеті.

Қазіргі уақытта ҚҚС-ты жеңілдетілген тәртіппен тек ірі кәсіпорындар мен тізімге енгізілген өндірушілер мен экспорттаушылар ғана қайтара алады. Мұндай компаниялар саны бүгінде 40–50 болса, жаңа жылдан бастап 1000-нан астам экспорттаушы осы құқыққа ие болады.

Жеңілдетілген тәртіппен ҚҚС тексерусіз 15 жұмыс күні ішінде қайтарылады. Ол үшін:

салық төлеушінің өтініш берген күні орындамаған хабарламалары болмауы тиіс;

соңғы 12 айда жүргізілген тексеруде қайтаруға жататын ҚҚС сомасы расталған болуы қажет.

Қайтару сомасы салықтық тәуекелдерді басқару жүйесі арқылы айқындалады. Бұрын ҚҚС қайтарудан бас тартуға себеп болған «Пирамида» есебі енді тәуекел аймақтарын анықтау құралы ретінде ғана қолданылмақ. Егер жеткізушілерде бұзушылық анықталса, тиісті сомалар қайтарылмайды.

Комитеттің хабарлауынша, бұл өзгерістер салық рәсімдерін ашық етіп, ҚҚС қайтару мерзімін қысқартуға және бизнестің әкімшілік жүктемесін азайтуға бағытталған.