Жаңбыршин Мәтен Петролеум басшысын екіге оқитын оқушыға теңеді

Мәжілістегі экология мәселелері және табиғат пайдалану комитетінде реттелетін сатып алулардағы қазақстандық қамту үлесін арттыру мәселесіне арналған тақырыптық отырыста депутат Еділ Жаңбыршин «Мәтен Петролеум» АҚ бас директоры Лю Цзиньчэнді «екіге оқитын оқушыға» теңеп, қатаң сынға алды.  

Депутат отандық тауар өндірушілермен жасалған ұзақмерзімді келісімшарттар туралы сұрақ қойды. Бас директор мұндай келісімдердің бар екенін, олардың саны алтау екенін айтты. 

Компания өкілдерінің бірі жауап беруге оқталған сәтте, Жаңбыршин сұраққа тікелей бас директордың өзі жауап беруі тиіс екенін талап етті. Сондай-ақ оның жоғары жалақы алатынын еске салып, нақты мәліметті жатқа білуі керектігін айтты.

Лю Цзиньчэн ақпаратты нақтылау қажет екенін айтты. Бұған жауап ретінде депутат оны «екіге оқитын оқушыға» теңеді. Реакция қатқыл шықты. Бірақ компания да — шағын мердігер емес.

«Мәтен Петролеумның» артында кім тұр?

АҚ 2010 жылы тіркелген, кеңсесі Атырауда орналасқан. Компания мұнай мен ілеспе газ өндіреді және Атырау облысындағы үш кен орнын игереді.

Мәтен (Қызылқоға ауданы). 1995 жылы ашылған. Қорында 108 ұңғыма бар. Қызметкерлер саны — 122 адам.Қара Арна (Жылыой ауданы). 1974 жылдан бері пайдаланылып келеді. Қорында 172 ұңғыма бар. Қызметкерлер саны — 176 адам.Шығыс Көкарна. 1979 жылы пайдалануға берілген. Қазіргі уақытта 27 ұңғыма жұмыс істеп тұр.

Кен орындары бойынша келісімшарттар бірнеше жылға: тиісінше 2028, 2034 және 2043 жылдарға дейін алдын ала жасалған. Яғни компания ұзақ мерзімді келісімдер бойынша жұмыс істейді және өңірдің маңызды активтерін бақылауда ұстайды.

2014 жылдан бері иесі — SINO-SCIENCE NETHERLANDS ENERGY GROUP B.V..

Құрылтайшылар арасында елдегі ең бай кәсіпкерлердің рейтингіне кіретін қазақстандық бизнесмен Бахаридин Аблазимов бар. 2024 жылы оның байлығы 305 миллион АҚШ долларына бағаланған.

Kompra деректеріне сәйкес, компания сондай-ақ «Қожан» АҚ және «SOZAK OIL AND GAS» АҚ‑мен байланысты.

Жауапсыз сұрақ

«Мәтен Петролеум» ресми сайтында компанияның тарихы мен кен орындары туралы ақпарат берілген. Алайда Мәжілісте сөз болған отандық тауар өндірушілерге қатысты дерек жоқ.

Редакция сайтта көрсетілген телефон арқылы компаниямен байланысуға тырысқанымен, жауап ала алмады. Кәсіпорынға ресми сауал жолданды.

«Шынымен компанияның қазақстандық өндірушілермен ұзақ мерзімді алты келісімшарты бар ма, егер болса — қандай шарттармен?» деген негізгі сауал әлі жауапсыз қалып отыр.

Айнұр САПАРОВА

Бүгін, 12:57