Жангелдиндегі отбасын өлтірді деген күдіктінің балалары мемлекет қамқорлығына алынды

Полицияның өтінішінен кейін шешім қабылданды: кәмелетке толмағандар шұғыл қорғалуы қажет деп танылып, әкесі іздеуде жүргендіктен уақытша отбасынан алынды.

Әңгіме Жангелдин ауылындағы тұрғындарды өлтірді деген күдікпен іздеуде жүргенСұлтан Сарсемалиевтің кәмелетке толмаған бес баласы туралы болып отыр.

Атырау облысының білім басқармасы хабарлағандай, 2 ақпанда полиция департаментінен балаларға қатысты жедел шара қабылдап, оларды қауіпсіз жерге орналастыру жөнінде ресми хат түскен.

Махамбет ауданы әкімдігі жанындағы кәмелетке толмағандардың ісі және олардың құқықтарын қорғау жөніндегі комиссия шешімімен үш бала уақытша Кәмелетке толмағандарды бейімдеу орталығына орналастырылды. Ал үш және бір жастағы ең кіші екі бала мамандандырылған Сәбилер үйіне жіберілді.

Басқарма балалардың жағдайы бақылауда екенін, уәкілетті органдар олардың қауіпсіздігін және құқықтарының сақталуын қамтамасыз етіп отырғанын нақтылады.

Бұған дейін полиция 29 жастағы Сәрсемалиевқа ресми түрде іздеу жариялаған. Осыдан кейін оның отбасы да жұртшылықтың назарын аударған еді.

Бұған дейін әкімдіктің хабарлауынша, отбасы қарапайым өмір сүрген, негізгі табыс көзі қарт туыстарының зейнетақысы болған. Көршілер тарапынан ешқандай шағым түспеген, отбасы тыныш, ешкіммен жанжалдасып көрмеген отбасы деп сипатталған.

Қамқорлыққа алу туралы шешім қабылданғанға дейін балалар әжесінің қарауында болған. Мектеп жасындағы балалар О. Шонаев атындағы орта мектепке барып жүрген, ал кішкентайлары үйде тәрбиеленген.

Қазіргі уақытта күдікті әлі іздеуде. Тергеу шаралары жалғасуда. Полиция азаматтарды тек ресми ақпаратқа сүйенуге және тексерілмеген деректерді таратпауға шақырады.

Айгүл МАНСУРОВА

Бүгін, 12:08