Жапония әлемдегі үшінші экономика

Жапония – технологиясы, тәртібі, дәстүрімен әлемді мойындатқан мемлекет.

Дүниежүзілік банк деректеріне сәйкес, өткен жылы елдің жалпы ішкі өнімі 4 триллион АҚШ долларынан асты.  Экономикасы жоғары технологиялы өндіріс салаларына, атап айтқанда көлік өндірісі мен туризм және қызмет көрсету секторына негізделген. Сонымен, Күншығыс елінің бүгінгі келбеті мен даму үдерісі қандай?

Туризм Жапония экономикасының негізгі қозғаушы күштерінің бірі. Кейінгі 20 жылда Күншығыс еліне келетін шетелдік туристер саны 9 есе артты. Бұған визалық режимнің жеңілдетілуі және ұлттық валютаның әлсіреуі себеп. Бүгінде туризм елдің экспорттағы маңызы бойынша екінші салаға айналды. Үкімет бұл секторды одан әрі дамытуды көздеп отыр. Алдағы 5 жылда жылына 60 миллион турист тарту көзделген. Жыл басынан бері Жапонияға 39 миллионнан астам шетелдік келген, бұл 2024 жылмен салыстырғанда екі миллионға көп. Алыстан ат арылтып келгендердің шамамен төрттен бірі Қытай азаматтары.

Жапония – әлемдегі үшінші ірі экономика

Жапония экономикасының тағы бір жетекші саласы – көлік өндірісі. Бұл сектор елдегі бүкіл өңдеуші өнеркәсіп көлемінің 20 пайызын құрайды. Жапон брендтері 1960 жылдары-ақ әлемдік нарыққа шықты. Әр өндіруші компания нарықтық орнын иеленген. Toyota өндіріс көлемі бойынша көш бастап, гибридті технологияларды белсенді дамытып келеді. Honda дәстүрлі түрде қозғалтқыш жасап шығаруда мықты. Nissan да жаһандық нарықта сапа мен сенімділіктің символына айналған. Жалпы, жыл басынан бері елде 4 миллион 230 мыңнан астам көлік сатылған. Қазір Күншығыс еліндегі автонарыққа АҚШ тарапынан енгізілген сауда шектеулері де кесірін тигізіп отыр. Вашингтон Жапониядан әкелінетін көліктер мен бөлшектерге 15 пайыздық баж салығын енгізді. Жаңа тарифтер тамыз айынан бастап күшіне енді.

Энергия өндірісіндегі жапон жетістіктері

Жапония жаңартылатын энергия көздеріне инвестиция салу көлемі бойынша әлемдегі үздік үш елдің қатарына кіреді. Үштікті Қытай мен АҚШ бастайды. Бұл туралы Халықаралық жаңартылатын энергия агенттігі хабарлады. Күншығыс елінің баламалы энергетиканы дамытуға жыл сайын жұмсайтын инвестициясы 12 миллиард еуро. Үкімет алдағы 15 жыл ішінде, ең алдымен күн және жел энергетикасының үлесін жалпы энергия көлемінің 40–50 пайызына дейін жеткізуді жоспарлап отыр. Бағдарлама 2050 жылға қарай таза энергетика саласында 67 мыңнан астам жаңа жұмыс орнын құруға жол ашады. Сонымен қатар үкімет көмір, газ және мұнай импортына тәуелділікті азайтуды көздейді. Бұл ресурстар  бұрын елдің энергетикалық қажеттілігін 70 пайызға дейін қамтамасыз етіп келген.

Нұрбике Жігер, Сандугаш Байгуаныш