Жасанды интеллекті кім басқаратыны белгілі болды

CNBC телеарнасының хабарламасына сүйенген Aikyn.kz ЖИ-ге арналған стандарттар мен қауіпсіздік талаптарын әзірлеу қажеттігін түсіндіреді.

Anthropic компаниясының бас директоры Дарио Амодей мен Google DeepMind жетекшісі Демис Хассабис АҚШ жетекшілік ететін халықаралық ЖИ коалициясын құруды ұсынды. Бұл бастама Францияның Эвиан-ле-Бен қаласында 15-17 маусымда өткен G7 саммитінің аясындағы жабық кездесуде талқыланды. Кездесуге АҚШ президенті Дональд Трамп, OpenAI басшысы Сэм Альтман және әлемнің ірі технологиялық компанияларының жетекшілері қатысқан.

Амодей мен Хассабистің пікірінше, жасанды интеллектің қазіргі даму қарқыны халықаралық үйлестіруді қажет етеді. Әсіресе жаңа буындағы модельдердің киберқауіпсіздік, барлау, биотехнология және қорғаныс салаларында қолдану күрт артып келеді. Сондықтан мемлекеттер мен технологиялық компаниялар ортақ стандарттар мен қауіпсіздік талаптарын әзірлеуі тиіс.

Anthropic басшысы Дарио Амодей халықаралық ынтымақтастықтың бірнеше негізгі бағытын атаған. Оның ішінде озық ЖИ модельдеріне бақылаулы қолжетімділік, жартылай өткізгіштер мен стратегиялық компоненттер саудасын үйлестіру, сондай-ақ киберқауіпсіздік пен биологиялық қауіптерге қарсы бірлескен әрекеттер бар.

Амодей халықаралық технологиялық тізбектерде Қытайдың қатысуын шектеу қажеттігін айтқан. Бұл АҚШ пен Қытай арасындағы технологиялық бәсекенің енді жасанды интеллект саласына толық көшкенін көрсетеді.

OpenAI басшысы Сэм Альтман да халықаралық деңгейде жаңа институт құру қажеттігін қолдаған. Оның пікірінше, әлемге ЖИ модельдерін тәуелсіз бағалайтын, қауіптерді саралайтын және ортақ стандарттарды қалыптастыратын халықаралық форум қажет.

Соңғы айларда бұл мәселе ерекше өзекті бола түсті. Anthropic жақында өзінің ең жаңа Fable 5 және Mythos 5 модельдеріне қолжетімділікті шектеді. АҚШ үкіметі ұлттық қауіпсіздікке байланысты бұл модельдерге экспорттық бақылау енгізді. Сарапшылардың айтуынша, аталған жүйелердің кибершабуылдарды анықтау және пайдалану қабілеті кейбір кәсіби мамандардың деңгейіне жақындаған.

Канада премьер-министрі Марк Карни де АҚШ-тың бұл салада жетекші рөл атқара алатынын мәлімдеді. G7 саммитіне қатысқан бірқатар мемлекет басшылары да халықаралық стандарттарды әзірлеуде Вашингтонның бастамашы болуын қолдаған.

Бұл бастама жасанды интеллектің болашағы тек технологиялық емес, геосаяси мәселеге айналғанын байқатты. Енді басты сұрақ – әлем ЖИ дамуын бірлесіп реттей ала ма? Әлде бұл салада жаңа технологиялық блоктар мен ықпал аймақтары қалыптаса ма?