Жастар жалындаған чемпионат

Семейдегі «Абай-Арена» спорт кешенінде бокстан еліміздің чемпионаты мәресіне жетті. Ерлер мен әйелдер арасында өткен дүбірлі додаға 371 боксшы қатысты. Бұл – егемендік алғалы бергі ең жоғары көрсеткіш. 2024 жылы ерлер – 13, әйелдер 12 салмақ дәрежесінде бақ сынаса, биыл жүлделер World Boxing ұйымы бекіткен 10 салмақта сарапқа салынды.

Жүлдесіз қалған жампоздар

Құрама сапында халықаралық турнирге қатысып, бағын сынап жүрген боксшылардың бәсекесі биыл да тартысты өтті. Көпшілік әлем чемпионы 37 жастағы Теміртас Жүсіповке зор сенім артқан еді. Бұған дейін 48 кг салмақта рингке шығып жүрген ол, биыл 50 кг салмақта бақ сынады. Алғашқы кездесуінде Біржан Нұрымбетовті жеңгенімен, 1/4 финалда Нұрсұлтан Нұриденовтен айласын асыра алмады. Теміртас жиі қателікке бой алдырып, жеңісті уысынан шығарып алды. Осылайша, еліміздің 8 дүркін чемпионы Семей төрінен құр қол қайтты.

– Жүлдесіз қалғаныма еш өкінбеймін. Барымды салдым, бірақ қарсыласым менен әлдеқайда жас, шапшаң қимылдап, белсенді болды. Жұмыс істеуім керек. Боксты жалғастырамын ба, әлде басқа салаға кетемін бе, оны алдағы күндер көрсетеді, – деді Т.Жүсіпов.

Жүлдесіз қалғандардың арасында 2017 жылғы әлем чемпионатының күміс жүл­дегері Әбілхан Аманқұл да бар. 2021 жылы Токио Олимпиадасының ширек финалында сүрінгеннен кейін кәсіпқой бокста бақ сынаған Әбілхан төрт жылдық үзілістен кейін қайта ел біріншілігінде бой көрсетті. Бірінші жекпе-жегінде жеңіске жеткен ол доданы ширек финалдан аяқтады.

60 кг салмақта ел чемпионы Талғат Сырым­бетов атағын қорғай алмады. 1/8 финалда оған жастар арасындағы әлем чем­пионатының қола жүлдегері Жансері Кө­шер­баев қарсылас атанды. Жас боксшы сауатты қимылының арқасында бірінші раундты өз еншісіне жазды. Екінші раундта қос боксшы баспен соқтығысып, айқас уақытынан бұрын тоқтатылды. Нәтижесінде, төрешілердің шешімімен Ж.Көшербаев 4:1 есебімен жеңіске жетті. Жансері алғашқы айналымда ел чемпионы Ерболат Сабырды тоқтатқан еді.

Былтыр Қарағандыда өткен біріншілікте 86 кг салмақта қарсыласының барлығын қоғадай жапырған Темірлан Мұқатаев 90 кг салмаққа ауысып, екінші кездесуінде жарыстан шығып қалды. Ширек финалда көпшіліктің асыға күткен кездесуі Санжар-Әли Бегалиев пен еліміздің бірнеше дүркін жүлдегері, әлем чемпионатына қатысушы Нұрқанат Райыстың айқасы небәрі бір минутқа ғана созылды. Жастар арасында әлем чемпионы Санжар-Әли жойқын соққысымен Нұрқанатты нокаутқа жіберді.

Әйелдер арасында Рио Олимпиадасының қола жүлдегері Дариға Шәкімова 65 кг сал­мақта алғашқы кездесуінде-ақ жасөс­пірімдер арасында Азия чемпионы Назерке Серікке қарсылық көрсете алмады. Сондай-ақ әлем біріншілігінің жеңімпазы Ләззат Күнгейбаева да бұл чемпионаттан бос қайтты.

Жиырмадағылар дес берер емес

Жастар арасында әлем чемпионатының бірнеше жүлдегері ұлттық құраманың тізіміне енді. Атап айтсақ, Нұрзат Оңғаров (20 жас, 50 кг), Бексұлтан Боранбек (19 жас, 55 кг), Илья Калинин (20 жас, 65 кг), Нұрбек Мұрсал (20 жас, 70 кг), Санжар-Әли Бегалиев (20 жас, 80 кг), Дәулет Төлемісов (19 жас, 85 кг), Аслан Еділбайұлы (19 жас, +90 кг) біріншіліктің алтын, күміс, қола жүлдегері атанды.

Жылдың басында алғаш рет 22 жасқа дейінгілер арасында ел чемпионаты ұйым­дастырылған еді. Сол кезде финалға шыққан боксшылардың арасынан тек Әбдіғалым Әбдікерім (65 кг) ғана жартылай финалға өтті. Өкінішке қарай, мықты деген Диас Берікбай (50 кг), Нұрислам Қалдыбаев (60 кг), Тілеуберді Сүлеймен (50 кг), Кенже Мұрат­ұлы (55 кг), Ағажан Қадыр (70 кг), Ислам Битаев (80 кг), Азатбек Жолдасхан (92 кг) ширек финалдан аса алмады.

Ересектер арасында тұңғыш рет чемпион атанғандардың арасынан 85 кг салмақтағы Дәулет Төлемісов ең жас жеңімпаз атанса, әйелдер сапында Элина Базарова (21 жас, 54 кг), Ұлжан Сәрсенбек (20 жас, 57 кг), Бақыт Сейдіш (20 жас, 70 кг), Валерия Аксеновалар да (24 жас, +80 кг) өз салмақтарында тұңғыш рет биік тұғырдан көрінді. Ең жасы үлкен чемпион ретінде бес баланың анасы Әйгерім Сәттібаева (34 жас, 48 кг) тіркелді. Ол бұған дейін 2010 жылы топ жарған еді. Ең жас чемпион атағын Ұлжан Сәрсенбек (20 жас) пен Бақыт Сейдіш (70 кг) иемденді. Ең үздік боксшылар – Сабыржан Аққалықов (75 кг) пен Жазира Орақбаева (51 кг). Бейресми командалық есепте Түркістан облысы – 4 алтын, 1 күміс, 3 қола медальмен көш бас­таса, Алматы қаласы (2+3+6) екінші орыннан көрінді. Үздік үштікті Шымкент қаласы түйіндеді (2+2+6).

Финалдық жекпе-жектер

Финалдық бәсекелер барынша тартысты, қызықты өтті. 55 кг салмақта сынға түскен әлем чемпионы Сәкен Бибосынов пен әлем кубогі кезеңінің жеңімпазы Нұрсұлтан Алтынбек арасындағы жекпе-жек көрермендердің айы­зын қандырды. С.Бибосынов жұдырықтасу кезінде қарсыласынан бірнеше соққы өткізіп, нәтижесінде бірінші раундты 2:3 есебімен аяқтады. Дегенмен тәжірибенің аты – тәжірибе. Тез өз-өзіне келген Сәкен қалған екі раундта жеңіске лайықты жұдырықтасып шықты. 60 кг салмақтағы Серік Теміржанов пен Бибарыс Жексеннің жекпе-жегі 4:1 есебімен аяқталды демесеңіз, ең тартысты өткен айқастың бірі болды. 75, 80 кг салмақ дәрежелерінде техникалық нокаут тіркелді. Сабыржан Аққалықов екінші раундта Тимур Нұрсейітовті техникалық нокаутпен жеңсе, Ерасыл Жақпеков бірінші раундта-ақ Диас Молжігітовті сол қолмен сұлатып түсірді.

Финалдық жекпе-жектердің нәтижелері. Ерлер: 50 кг. Даниял Сәбит (Батыс Қазақстан облысы) – Бекзат Алдамжаров (Ақтөбе облысы) – 5:0; 55 кг. Сәкен Бибосынов (Түркістан облысы) – Нұрсұлтан Алтынбек (Қызылорда облысы) – 5:0; 60 кг. Серік Теміржанов (Павлодар облысы) – Бибарыс Жексен (Жамбыл облысы) – 4:1; 65 кг. Санатәлі Төлтаев (Маңғыстау облысы) – Ертуған Зейнуллинов (Алматы облысы) – 4:1; 70 кг. Абылайхан Жүсіпов (Қарағанды облысы) – Фарух Тоқтасынов (Алматы) – 5:0; 75 кг. Сабыржан Аққалықов (Қарағанды облысы) – Тимур Нұрсейітов (Астана); 80 кг. Ерасыл Жақпеков (Абай облысы) – Диас Молжігітов (Жамбыл облысы); 85 кг. Дәулет Төлемісов (Ақтөбе облысы) – Сұлтанбек Айбарұлы (Алматы) – 5:0; 90 кг. Сағындық Тоғамбай (Түркістан облысы) – Нұрмағамед Юсупов (Қарағанды облысы) – 3:2; +90 кг. Нұрлан Сапарбай (Түркістан облысы) – Аслан Елдібайұлы (Қызылорда облысы) – қарсыласы жарақатына байланыс­ты жекпе-жекке шықпағандықтан, жеңіс Сапарбайға берілді.

Әйелдер: 48 кг. Әйгерім Сәттібаева (Жамбыл облысы) – Әнел Құдайберген (Жетісу облысы) – 5:0; 51 кг. Жазира Орақбаева (Алматы) – Анита Әдішева (Қарағанды облысы) – 5:0; 54 кг. Элина Базарова (Шымкент) – Жайна Шекербекова (Шымкент) – 4:1; 57 кг. Ұлжан Сәрсенбек (Түркістан облысы) – Карина Ибрагимова (Ақмола облысы) – 5:0; 60 кг. Римма Волосенко (Астана) – Анар Тұрсынбек (Жетісу облысы) – 4:1; 65 кг. Лаура Есенгелді (Шымкент) – Аружан Жаңабаева (Түркістан облысы) – 4:1; 70 кг. Бақыт Сейдіш (Алматы) – Мәдина Нұршаева (Шымкент) – 3:2; 75 кг. Валентина Хальзова (Астана) – Мария Сидоренко (Жетісу облысы) – 5:0; 80 кг. Надежда Рябец (Қостанай облысы) – Анастасия Рылина (Қостанай облысы) – Рябец бірінші раундта техникалық нокаутпен жеңді; +80 кг. Валерия Аксенова (Ақмола облысы) – Әсел Тоқтасын (Алматы) – 4:1.

АСТАНА – СЕМЕЙ – АСТАНА