Жастар жобасына қызығушылық артқан

Іс-шара ҚР Президентінің жанындағы Мемлекеттік басқару академиясында өтті. Жиынға Мемлекеттік қызмет істері агенттігінің төрағасы Дархан Жазықбай, Президент Әкімшілігінің, Мемлекеттік басқару академиясының өкілдерімен қатар жастар резервіне өткен үздік мамандар қатысты. Биыл резервке төртінші мәрте іріктеу өтті. Жобаны ұйымдастырудың басты мақсаты – мемлекеттік басқару жүйесіне іскер, бастамашыл жаңа буынды араластыру, білім-білігі жоғары мамандарды кәсіби қолдау. Жоба 2019 жылы Мемлекет басшысы Қасым-Жомарт Тоқаевтың бастамасымен, қолдауымен іске аса бастаған.

Биылғы іріктеу, расында да, тартысты әрі күрделі болды. Жастардың да жобаға қызығушылығы артқан. Іріктеуге 31 мыңнан аса үміткер өтінім берген, оның 7436-сы келесі кезеңдерге қатысуға мүмкіндік алды. 50 жас үміткер 6 кезеңдік тартысты бәсекеден оқ бойы оза шауып, мыңдаған қатысушыдан суырылып алға шықты. Кездесуде агенттік төрағасы Дархан Жазықбай финалистерді құттықтап, алдағы істеріне бағыт-бағдар беріп, жобаның стратегиялық маңызы мен мүмкіндіктерін түсіндіріп өтті. 

– 2019 жылы Мемлекет басшысының сайлауалды Жолдауында жастарды мемлекеттік басқаруға тарту және әлеуметтік лифт қалыптастыру қажет деген бастама жасаған еді. Содан бері тиісті жұмыстар жүріп жатыр, басқа да жобаларды ұсынып жатырмыз. Мемлекет басшысы мәселе үлкен бастық болуда емес, резерв өкілі болудың мәні ел үшін аянбай еңбек етуде деген болатын. Жастарымыздың бойындағы тасқындаған күш-жігер мен білімді ел мүддесіне бағыттау, кәсіби мемлекеттік қызметшілердің жаңа легін қалыптастыру – агенттіктің стратегиялық мақсаттарының бірі, – дейді Д.Жазықбай.

Агенттік қатысушыларды алты сала аясында таңдауды жөн көрген, ол үшін алдымен әр сала бойынша қандай маман иелеріне мұқтаждық барын зерттеп, талдау жасаған. Биылғы жобаның ерекшелігі де осында. Нәтижесінде, инфрақұрылымды өнеркәсіпті дамыту және сауда саясаты, агроөнеркәсіптік кешен және қоршаған ортаны қорғау, сыртқы саясат және инвестициялар, экономика және қаржылық саясат, цифрландыру, әлеуметтік саясат және азаматтық қоғам сынды салалар бойынша квота бөлінді. Кандидаттардың басым көбі әлеуметтік саясат бағытын таңдаса, сыртқы саясат саласына қатысушылар аз тіркеліпті. Ақтық кезеңде 100 қатысушы Ұлттық комиссияның сынағына қатысты. Президенттік кадр резервіне қабылдана алмағандар өңірлік резервке жолдама алу мүмкіндігіне ие болды. Ал президенттік резервке енген тұлғалар конкурссыз негізде «А» корпусының саяси және әкімшілік мемлекеттік лауазымдарына, «Б» корпусының басшылық лауазымдарына тағайындала алады.

Dauletten қайырымдылық қорының президенті Жасұлан Бостандықұлы да резервке мүше болды.  Біз жеңісімен құттықтап, жоба жайында пікірін білдік.

– Бұл резервке 2019 жылдан бері қатысып келе жа­тырмын. Биыл ғана кадрлық резерв мүшесі болу бұйырыпты. Әрине, әр кезеңнің өз қиындығы мен ауыртпалығы бар, себебі мәтіндік, логикалық, ситуациялық, стреске төзімділік сынды түрлі-түрлі кезең бойынша бізді бақылады, зерттеді, сынады. Барынша тырысып, толыққанды жауап беріп, кадрлық резерв мүшесі атанып отырмын. Мемлекеттік қызметке тағайындалу ашық конкурс негізінде өтсе, дәл осы резерв мүшелері тікелей тағайындалу мүмкіндігіне ие болады, – дейді финалист. 

Д.Жазықбайдың айтуынша, іріктеуден өткен мамандардың жеке дерегі Үкімет аппаратына, Президент Әкімшілігіне, жергілікті атқарушы органдарға,  басқа да мемлекеттік органдарға жіберілді, алда сұранысқа сай мүмкіндіктер де болмақ. Ендігі кезекте мамандардың жаңа ісі мен кәсіби жолына сәттілік серік болсын дейміз.

Айсұлу СЪЕЗХАН