Жаз бойы кітап оқып жарысады

Оқу марафонының ашылу рәсімінде университеттің бас­қарма төрағасы – ректор Ер­лан Сыдықов сөз сөйлеп, кітап­тың жастар тәрбиесіндегі орнына ерекше тоқталды. Ол оқу мәдениетін қалыптастыру білім сапасын арттыру­дың, бәсекеге қабілетті ұрпақ тәрбие­леу­­дің маңызды шарты екенін атап өтті.

Кейін сөз алған жазушы Алдан Смайыл кітаптың ұлт руханиятын сақтаудағы, жас ұрпақтың дүние­танымын қалыптастырудағы ерекше рөлін баяндады. Ол жастарды көркем әдебиетті тұрақты оқуға шақырып, кітап оқу мәдениетін дамыту елдің интеллектуалдық әлеуетін арттырудың маңызды тетігі екенін айтты. Сондай-ақ қаламгер қазіргі ақпараттық дәуірде сапалы әдебиеттің ма­ңызы бұрынғыдан да арта түскенін жеткізді.

Марафон ережесіне сәй­кес қаты­сушылар жаз бойы өздері оқыған көркем әдеби шығармалар туралы әлеуметтік желілерде пікір жазып немесе қысқаша бейнероликтер жариялай алады. Оқылатын кітап санына шектеу қойылмайды. Жоба қорытындысы бойынша белсенді қатысушылар алдағы қыркүйек айында марапатталады.

Кеш барысында мәдени бағдарлама ұсынылды. Бір­неше республикалық және халықаралық байқаулардың жеңімпазы, жас күйші Ерсұлтан Медет күй өнерінен шашу шашып, көрерменнің ыстық ықыласына бөленді.

Сондай-ақ Ғылыми кітап­хананың директоры Бақытжан Оразалиев кітапхананың оқу мәдениетін қалып­тастыру мен оқырман қауымның рухани сұранысын қанағаттандыру бағытындағы жұмысы туралы айтты. Кездесуде зиялы қауым өкілдері мен ғалымдар жастарға кітап оқудың маңызы жөнінде тағылымды пікірлерін ортаға салды.

Поэзия бөлімі де көп­шіліктің көңілінен шықты. Әлеуметтік желіде танылып жүрген жас талант, Қараөткел орта мектебінің оқушысы Асылай Төленді мен №101 орта мектептің оқу­шысы Балым Оразғали өлең оқыды. Жұмекен Нәжімеденовтің «Әке мен бала» шығармасы әсерлі оқылып, әдебиет­сүйер қауымды ерекше тол­қытты.

Іс-шараның «Мен ұсынатын кітап» атты бөліміне филология ғылымдарының докторы, профессор Серік Неги­мов жетекшілік етті. Ғалым кітаптың адам өміріндегі орны мен көркем әдебиеттің тұлға қалыптастырудағы рөлі туралы мазмұнды ойларын ортаға салды. Өзінің сүйіп оқитын шығармалары жөнінде әңгімелеп, жастарға рухани азық болатын туындыларды оқуға кеңес берді.