Жезқазған әкімі Қайрат Шайжанов отставкаға кетті

Қайрат Шайжанов төрт жылдық қызметінен кейін Жезқазған қаласының әкімі лауазымынан кететінін мәлімдеді. Бұл шешімі туралы ол Instagram парақшасында жарияланған тұрғындарға арнаған үндеуінде айтып, қалалықтарға қолдау көрсеткені және бірлесе атқарған жұмыстары үшін алғыс білдірді, деп хабарлайды Tengrinews.kz тілшісі.

Өз үндеуінде әкім төрт жыл бойы қала тұрғындарымен бірге Жезқазғанды дамыту және түрлі мәселелерді шешу жолында еңбек еткенін атап өтті.

"Бұл кезең мен үшін үлкен жауапкершілік қана емес, баға жетпес өмірлік және кәсіби тәжірибе сыйлаған маңызды мектеп болды", - делінген жазбада.

Сондай-ақ ол тұрғындарға ұсыныстары, пікірлері мен сыни көзқарастары үшін алғыс айтып, қолдаудың күш бергенін, ал ескертулердің шыңдала түсуге көмектескенін жеткізді.

Әкім осы жылдар ішінде қаламен арада ерекше байланыс орнағанын баса айтты.

"Мен үшін Жезқазған - тек жұмыс істеген қалам емес. Бұл - тағдырымның бір бөлігі, еңбегім мен жүрекке жылы естеліктерім байланысты мекен", - деді ол.

Сөзінің соңында ол Жезқазғанның одан әрі гүлденуін, ал тұрғындарға амандық пен бейбітшілік тіледі.

"Бұл лауазымдағы жұмысым аяқталғанымен, Жезқазғанға деген қамқорлығым мен қалаға деген ақ тілегім ешқашан таусылмайды. Қаламыздың дамуы жалғаса берсін, әр шаңырақта береке мен тыныштық орнасын! Жезқазғанның болашағы жарқын болсын!" - деп жазды әкім.

Шайжанов Қайрат Абдуллаұлы 1977 жылы 22 шілдеде Жаңаарқа ауданының Атасу кентінде дүниеге келген.

Екі жоғары білімі бар, Қарағанды мемлекеттік техникалық университетін және Қазтұтынуодағы Қарағанды экономикалық университетін бітірген.

Еңбек жолын 2000 жылы бастаған. Әр жылдары бизнес саласында және түрлі мемлекеттік қызметтерде еңбек етті.

2009-2013 жылдары Сәтбаев қаласы әкімінің орынбасары болып жұмыс істеді.

2015-2018 жылдары Қарағанды облысы Осакаров ауданының әкімі лауазымын атқарды.

2022 жылғы 28 маусымда Ұлытау облысы әкімінің өкімімен, Президент Әкімшілігінің және Жезқазған қалалық мәслихаты депутаттарының келісімімен Қайрат Шайжанов Жезқазған қаласының әкімі болып тағайындалған еді.

Бізді Google-дың негізгі дереккөздер тізіміне қосыңыз