Жезқазғандағы облыстық ауруханада тарақан қаптаған

АСТАНА, 21 қазан - Sputnik. Жезқазған қаласындағы облыстық көпбнйінді ауруханада тарақан қаптап жүр. Денсаулық сақтау басқармасындағылар Sputnik Қазақстан тілшісіне мұндайға ғимараттың тозуы себеп екенін айтты.

Облыстық аурухананың педиатрия бөлімшесі 25 қыркүйекке дейін Жезқазған қаласының қалалық инфекциялық орталығында орналасқан. 26 қыркүйекте педиатрия бөлімі Луч нейрореабилитациялық орталығының орнына көпсалалы аурухананың негізгі ғимаратына көшірілді.

"Көшпес бұрын бөлімшеде жәндіктерге қарсы профилактикалық дезинфекция және дезинсекция жүргізілді. Дегенмен, педиатрия бөлімінде жәндіктер табылды. Бұл ғимараттың тозғандығынан және ғимараттағы күрделі жөндеуге байланысты", - дейді облыстық денсаулық сақтау басқармасындағылар.

Негізі дезинсекция бойынша жоспарлы жұмыстар жүргізілген. Шағым түскен соң педиатрия бөлімшесіне дезинсекциялық жұмыстарды жүргізу үшін мамандар жіберілген.

"Қазіргі уақытта тозығы жеткен ғимаратта күрделі жөндеу жұмыстары басталды. Оның барысында ғимараттың барлық жүйесі жаңартылады", - дейді басқарма өкілдері.