ЖИ саласында гендерлік алшақтық бар: әйелдер оған онша сенбейді

CNBC материалына сүйенген Aikyn.kz әйелдер мен ерлер арасындағы ЖИ-ге көзқарастың әртүрлі болу себебін түсіндіреді.

10-16 ақпан аралығында 6330 адам қамтылған зерттеу ChatGPT-дің алғаш шыққанына 3 жылдан аса уақыт өткен тұста жүргізілді. Содан бері чат-боттар, ЖИ арқылы фото-видео жасау, код жазуға арналған агенттер кең тарады. Сауалнама ЖИ-ді жұмыс орнында ерлер жиірек қолданатынын көрсеткен. Әйелдердің 64%-ы «жұмыста ЖИ-ді ешқашан қолданбаймын» десе, ерлерде бұл көрсеткіш 55%. Белсенді пайдаланушылардың ішінде де айырма бар: ерлердің 14%-ы ЖИ-ді «күніне бірнеше рет» қолданатынын айтқан. Чат-ботты күнде қолданатын әйелдердің үлесі 9% ғана.

Сауалнамаға қатысқан әйелдердің 50%-ы «ЖИ-ді жұмыста қолдану – алдауға ұқсайтынын» айтқан. Ерлерде бұндай көзқарас 43% деңгейінде.

Сонымен бірге, ерлер өздеріне әлі де көбірек үйрену керек екенін жиірек мойындайды. Сауалнамадағы ерлердің 59%-ы ЖИ-ді жұмыста қолдану бойынша қосымша оқыту қажет дейді. Ерлердің 39%-ы ЖИ-ді меңгермесем, жұмыста маңызды дүниеден қалып қоямын деп қауіптенеді, әйелдерде бұндай қауіп деңгейі 35%-ды құрайды. Ал әйелдердің 42%-ы «ЖИ-ді меңгермеу мені жұмыста маңызды нәрседен құр қалдырмайды» деген пікірмен мүлде келіспейтінін айтқан. Бұндай пікірмен ерлердің 36% ғана келіседі.

JPMorgan Chase бас директоры Джейми Даймон ЖИ-ді «компанияның болашақ табысы үшін аса маңызды» деп санайды. 2026 жылғы инвесторлар күнінде ол банктегі қызметкерлердің шамамен үштен екісі ішкі үлкен тілдік модельді қолданатынын айтқан. Бас директор ЖИ кейбір жұмыс орындарын қысқартуы мүмкін екенін, бірақ компанияларға адамдарды қайта оқыту тиімді екенін меңзеген.

Ал LeanIn.Org негізін қалаушы Шерил Сандберг: «ЖИ еңбек нарығына қиындық әкеледі. Ал бұл қиындықтар ең алдымен осы құралдарды қолдана алмайтындарға ауыр тиеді. Біз пропорционалды емес салдарды көреміз. Бұл компаниялар үшін де трагедия, экономика үшін де зиян», – деп санайды.

Оның пікірінше, егер ерлер ЖИ-ді ертерек әрі көбірек қолданса, бұл әйелдердің мүмкіндігін азайтып, ұзақ мерзімді теңсіздікті күшейтуі ықтимал.