Жолдағы өлім жітім 9,4 пайызға азайды

Түркістан газетінің тілшісіне берген сұхбатында Президент жол апаты мәселесіне де тоқталды.

Қасым-Жомарт Тоқаевтың пікірінше, басты себептің бірі – автокөліктің көбеюі. Елдегі автокөлік саны былтыр 300 мыңға, ал соңғы бес жылда 1,7 млн-ға артқан. Оның үстіне шамамен 3 млн транзиттік автокөлік Қазақстан арқылы өтеді. Автокөлік көбейген сайын жолдағы апаттардың да ықтималдығы артады. Бұл ретте мемлекет басшысы құқық бұзушылықты анықтау мен жолын кесу жұмыстары жанданғанын атап өтті. Инфрақұрылым жетілдірілді, бақылау күшейді. Жол қауіпсіздігін қамтамасыз ету мақсатында айыппұлды өсіру шешімі қабылданды. Соның нәтижесінде ахуал жақсарып келеді, көлік апаттарынан болған адам өлімі 9,4 пайызға азайды.

Қасым-Жомарт Тоқаев, Қазақстан Республикасының Президенті:

- Кейбір дамыған елдерде көлік апаттарының алдын алу үшін жаңа тұжырымдама енгізіліп жатыр. Соған сәйкес, әр адам полиция қызметкерлеріне ұсталып қалудан қорыққандықтан емес, өзінің және басқа адамдардың қауіпсіздігін ойлағандықтан жол ережесін сақтауға тиіс. Бұған қоса осы салаға жаңа технологияларды, соның ішінде жасанды интеллектіні кеңінен енгізген жөн. Біз көліктер тоқтаусыз жүретін көшелер саламыз. Сондай-ақ қоғамдық көліктердің қауіпсіздігіне айрықша назар аударамыз. Себебі автобустардың жол апатына ұшырауы азаюдың орнына көбейіп барады.