Жамбыл облысында жол апатынан болатын өлім жітім азайды

Жамбыл облысындағы республикалық маңызы бар тас жолдарда көлік апатынан көз жұму дерегі 26%-ға төмендеді.

Бұл тәртіп сақшыларының жол қозғалысына ерекше тәсілдер енгізуінің арқасы, дейді өңірдің бас полицейі. Құқық қорғаушылар жол апатының алдын алу үшін дрон ұшырып, қауіпті аумақтарда тәулік бойы профилактикалық жұмыс жүргізіп жатыр. Әсіресе Батыс Еуропа – Батыс Қытай автодәлізіне басымдық беруде.

«Батыс Еуропа – Батыс Қытай» автодәлізі бастапқыда тәулігіне 15 мың көліктің өтуіне арналған. Әйтсе де, қазір 40 мың автомобиль қатынап жатыр. Салдарынан жыл санап жол апаты да көбейген. Полиция департаменті басшысының сөзінше, апаттың басым бөлігі түн ортасы мен таңға жуық болады. Сондықтан тәртіп сақшылары былтырдан бері ұйқы қысқан жүргізушілерді тоқтатып, бетіне су бүркіп сергіту тәсілін қолданып жатыр. Жалпы Жамбыл облысында жол апаты жиі тіркелетін 36 учаске бар. Әсіресе тау бөктеріндегі өткелдер қауіпті. Былтыр осы аумақтарда 281 жол апаты болған.

Болатбек Баятанов, облыстық ПД әкімшілік полиция басқармасының бастығы:

- Қауіпті тас жолдарда жасырын патрульдеу әдісін қолданып жатырмыз. Ол үшін құқық бұзушылықтарды автоматты түрде тіркейтін 10 автокөлік алынды. Мақсатымыз тек айыппұл салу емес, жүргізушілерді ереже бұзбауға дағдылау. Күн сайынғы патрульдеу барысында бұл автокөліктердің әрбір экипажы орта есеппен 50–60 ереже бұзушылықты анықтайды.

Бүгінде республикалық маңызы бар тас жолдарда қашықтықтан бақылайтын дрон да жұмылдырылған. Пилотсыз басқарылатын құрылғы автобан бойын 15 шақырымға дейін бақылап, әуеде 40 минут ұша алады. Жыл басынан бері дрон көмегімен 400-ден астам жолдың қарсы бетіне шығу дерегі анықталған. Айта кетейік, енді аймақта автобустар мен жедел-жәрдем көліктеріне айыппұл жазатын камералар орнатылмақ.

Қайсар Сұлтанбаев, облыстық полиция департаментінің бастығы:

- Біз қазір тағы осындай аппараттар алу көзделген. Паркрайт болсын, автосканер болсын, экип-патруль болсын осылардың бәрін мынау маршруттық автобустарға қалада жүретін. Және де жедел жәрдем автокөліктеріне қойып, олар да күнделікті жол қозғалысына қатысып жүрген кезде әр түрлі болып жатқан жол ережесін бұзу фактілерін анықтап отырады.

Жыл басынан бері Жамбыл облысы жолдарында 1600-ден астам жол-көлік оқиғасы тіркелді. Салдарынан 182 жолаушы қаза болды. Бұл өткен жылмен салыстырғанда 26%-ға төмен. Тәртіп сақшылар жол-көлік оқиғаларын азайту үшін тағы да жаңа әдістер әзірлеп жатқанын мәлімдеді.

Мерей Бает, Тимур Сейілхан, Бақытжан Бапаев