Жомарт Ертаев бостандыққа шықты, бірақ бақылауда қалды

Экс-банкир Жомарт Ертаев бостандыққа шықты, деп хабарлайды Tengrinews.kz. Ақпаратты Қазақстан ІІМ Қылмыстық-атқару жүйесі комитетінің баспасөз қызметі растады. Ол бүгін, 16 қыркүйекте түзеу мекемесінен босатылғаны хабарланды.

Ресми деректер бойынша, Ертаев сот тағайындаған жаза мерзімін толық өтеуіне байланысты босатылды.

"Сонымен қатар заңнамаға сәйкес оған қатысты 6 жыл мерзімге әкімшілік қадағалау орнатылады. Әкімшілік қадағалау заң бойынша адам бас бостандығынан айыру орындарынан босатылғаннан кейін оның мінез-құлқына ішкі істер органдары тарапынан бақылау жасауды көздейді", - деп хабарлады ІІМ ҚАЖК баспасөз қызметі Tengrinews.kz-ке.

2020 жылдың қарашасында экс-банкир Жомарт Ертаев қаражат жымқыру дерегі бойынша 11 жылға бас бостандығынан айырылған болатын. Онымен бірге тағы 35 адам сотталды.

Экс-банкир Bank RBK-ға тиесілі 144 миллиард теңгені жымқырғаны үшін кінәлі деп танылды. Сондай-ақ оған 10 жыл бойы банктік және қаржылық қызметпен айналысуға тыйым салынды. Ол кезде мемлекеттік айыптау Ертаевтың кінәсін мойындағанын, қылмыстық істі тергеуге көмектескенін және шығынды ішінара өтегенін ескерген еді.

Іс бойынша басқа айыпталушылар - Bank RBK басқармасының бұрынғы төрағасы Игорь Мажинов пен Qazaq banki-нің бұрынғы акционері Бақыт Ибрагим мүлкі тәркіленіп, 10 жыл бойы банктік және қаржылық қызметпен айналысу құқығынан айырыла отырып, 8 жылға сотталды.

Кейін Ертаев тағы бір қылмыстық іс бойынша - Bank RBK, Qazaq Banki және Еуразиялық банктен несие қаражатын жымқырғаны үшін сотталды. Бұл іске қатысты сот Ертаевтың төрт сыбайласына да үкім кесті. Оларға банктерге ірі көлемдегі соманы қайтару міндеттелді: Bank RBK пайдасына - шамамен 98 миллиард теңге, Qazaq Banki-не - 46 миллиард теңгеден аса, Еуразиялық банкке - 24 миллиард теңгеден аса.

2021 жылдың наурызында сот Жомарт Ертаевтың бірінші қылмыстық іс бойынша жазасын жеңілдетті. 11 жылдың орнына оған 9 жыл мерзім тағайындалды.

2025 жылғы қыркүйекте экс-банкир Жомарт Ертаев оң мінез-құлқы үшін рақымшылыққа іліккені белгілі болды.

ҚАЖК Ертаевтың колониядан босап шыққанын және әрі қарай бақылау мен қадағалау үшін пробация қызметінің есебіне алынғанын хабарлады. Ішкі істер министрі Ержан Сәденов те бұрынғы банкирдің колониядан босатылуына қатысты пікір білдірді.

Сотта Ертаевтың Қазақстан Конституциясының 30 жылдығына байланысты рақымшылық актісін қолдану туралы өтініші былтыр 2 қыркүйекте қаралып, қанағаттандырылғанын айтты.

Колонияда Ертаевқа мінез-құлықтың бірінші оң дәрежесі берілгені атап өтілді. Сол уақытта ол 8 жыл 3 ай 14 күн мерзімін өтеген, ал өтелмеген мерзімі 11 ай 16 күн болған.

Қазанда Мәжіліс депутаты Абзал Құспан экс-банкир Жомарт Ертаевты босату туралы сот қаулысының күші жойылғанын мәлімдеді. Кейін ҚАЖК Ертаев қамауда екенін хабарлады.

Алматы облыстық сотының мәліметінше, 2 қыркүйекте Алатау қалалық соты Ертаевты өтелмеген мерзімі бойынша рақымшылықпен босатқан. Бұл ретте апелляциялық инстанция Ертаевтың екі үкім бойынша: 2020 және 2021 жылдары сотталғанын, ал түпкілікті жаза мерзімі соттың жеке қаулысымен белгіленгенін анықтады.

Істі қарау барысында бірінші сатыдағы сот мерзімнің нақты қай үкім бойынша есептелетінін көрсетпегені, бірінші үкім бойынша өтелген жазаны есепке алмағаны, сондай-ақ мерзімдерде түзеу мекемесінің деректерімен сәйкессіздіктерге жол бергені анықталды. Осы қателіктерге байланысты рақымшылықты қолдану туралы шешімнің күші жойылып, өтінішті қанағаттандырудан бас тартылды.

Биыл ақпанда Жомарт Ертаев рақымшылықпен босату туралы шешімнің күшін жойған апелляциялық инстанция қаулысына шағымдана алмайтыны белгілі болды. Бұл туралы Жоғарғы сот хабарлады. Ертаевқа қатысты рақымшылық актісін қолдану туралы бірінші сатыдағы соттың шешімін бұзған апелляциялық инстанция қаулысы Қылмыстық-процестік кодекстің 484-бабы 2-бөлігі 2-тармағына сәйкес әрі қарай шағымдануға жатпайтыны атап өтілді.

Бізді Google-дың негізгі дереккөздер тізіміне қосыңыз