Жомарт Ертаевқа қатысты рақымшылықтың күші жойылды

Сотталған бұрынғы банкир Жомарт Ертаев өзін рақымшылық бойынша босату туралы шешімнің күшін жойған апелляциялық инстанция қаулысына шағым түсіре алмайды. Бұл туралы Жоғарғы соттың Tengrinews.kz редакциясының ресми сауалына берген жауабында айтылған.

Жоғарғы соттың түсіндіруінше, апелляциялық инстанцияның шешімі қайта қарауға жатпайды.

«Ертаевқа қатысты рақымшылық актісін қолдану туралы бірінші инстанция сотының шешімін бұзған апелляциялық инстанция қаулысына Қылмыстық-процестік кодекстің 484-бабы 2-бөлігінің 2-тармағына сәйкес бұдан былай шағымдануға болмайды», — деп хабарлады Жоғарғы соттан.

Аталған бап апелляциялық қаулылардың қайсысын кассациялық тәртіппен қайта қарауға болатынын, ал қайсысын болмайтынын айқындайды. Бұл баптың 2-бөлігінде бұдан былай шағымдануға жатпайтын қаулылардың нақты тізімі көрсетілген.

Сонымен қатар Жоғарғы сот Ертаевты мерзімінен бұрын босату туралы өтінішхаттың «сотқа түспегенін» атап өтті. Бұдан экс-банкирдің мерзімінен бұрын босату туралы өтініш бермегенін аңғаруға болады.

Қылмыстық-атқару жүйесі комитеті (ҚАЖК) редакция сауалына Ертаевтың қазіргі уақытта сот шешіміне сәйкес тиісті мекемеде жазасын өтеп жатқанын ғана хабарлады.

«Сотталған адамның жазасын өтеу орны туралы оның жақын туыстарына хабарланады», — деп толықтырды Комитет өкілдері.

ҚАЖК «Дербес деректер және оларды қорғау туралы» заңға сүйеніп, Ертаевтың жеке ісіне қатысты өзге ақпаратты жариялаудан бас тартты.