ЖСДП инклюзивті білім беру мәселесін көтерді

Бүгін Астанада Жалпыұлттық социал-демократиялық партиясының ұйымдастыруымен «Заманауи білім беру мәселелері» атты конференциясы өтті, - деп хабарлайды Aikyn.kz сайты ЖСДП-ның баспасөз қызметіне сілтеме жасап. 

Жалпыұлттық социал-демократиялық партиясы бүгінгі басқосуда ерекше білім беру қажеттілігі бар балаларға арналған мамандардың тапшылығы, білім беру бағдарламаларының еңбек нарығының нақты сұранысынан алшақтығы, сондай-ақ ғылымды қаржыландыру жүйесіндегі ашықтықтың жеткіліксіздігі секілді мәселелерді кеңінен талқыланды.

Іс-шараға партия басшылығы, ЖСДП-дан Құрылтай депутаттығына кандидаттар, педагогтер, сондай-ақ балалар құқықтарын қорғау саласының сарапшылары қатысты.

Конференцияның негізгі тақырыптарының бірі – Қазақстандағы педагог мәртебесінің қазіргі жағдайы мен білім беру сапасы болды. Баяндамашылардың айтуынша, қолданыстағы заңнамалық өзгерістерге қарамастан, мұғалімдер әлі күнге дейін шамадан тыс бюрократиялық жүктеме алып, өздерінің негізгі кәсіби міндеттеріне қатысы жоқ жұмыстарды атқаруға мәжбүр. ЖСДП-дан Құрылтай депутаттығына кандидат Ажар Сағандықова өз сөзінде «Педагог мәртебесі туралы» заңның іс жүзіндегі орындалуы көңіл көншітпейтінін атап өтті.

«Қабылданған "Педагог мәртебесі туралы" заңның нақты іс-жүзінде орындалуы әлі де көңіл көншітпейді. Мұғалімдер бүгінге дейін өздерінің кәсіби қызметіне қатысы жоқ міндеттерді атқаруға мәжбүр. Ал мектепте орын алған кез келген мәселе үшін, ең алдымен мектеп директорлары жауапқа тартылады. Біз бала тәрбиесі – тек мектептің ғана емес, ата-ананың да ортақ жауапкершілігі екенін түсінуіміз қажет. Сонымен қатар, еліміздегі дәстүрлі білім беру жүйесі бүгінде тәжірибеге жеткілікті деңгейде бағдарланбаған. Жоғары оқу орындарының түлектері еңбек нарығына көбіне тек теориялық біліммен шығады. Сондықтан еліміздің ірі өндірістік кәсіпорындары жас мамандарды өндірістік тәжірибеден өткізуге белсенді атсалысуы тиіс. Сонда ғана біз жасанды интеллект дәуірінің талаптарына бейімделген, бәсекеге қабілетті әрі дайын мамандарды қалыптастыра аламыз», – деді Ажар Сағандықова.

Конференция барысында партия өкілдері ғылым мен білім саласының жүйелі түрде жеткіліксіз қаржыландырылуы мәселесіне ерекше назар аударды. Олардың пікірінше, бұл ең алдымен шалғай өңірлердегі тұрғындардың сапалы білімге қол жеткізу мүмкіндігіне кері әсерін тигізіп отыр. ЖСДП-дан Құрылтай депутаттығына кандидат Наурыз Сайлаубай партияның сайлауалды бағдарламасында ғылым мен білімді қолдауға қатысты нақты міндеттер белгіленгенін атап өтті.

«ЖСДП-ның сайлауалды бағдарламасында ірі кен өндіруші компаниялар табысының кемінде 1 пайызын ғылымды дамытуға бағыттау, ал жалпы ғылым саласын қаржыландыру көлемін жалпы ішкі өнімнің (ІЖӨ) 2 пайызына дейін жеткізу талабы нақты көрсетілген. Сонымен қатар, бюджет қаражатын бөлу кезінде сыбайлас жемқорлықтың кез келген көрінісіне қатаң тосқауыл қойылған жағдайда ғана қала мен ауылдағы барлық балаға сапалы білімге тең қолжетімділікті қамтамасыз ете аламыз», – деді ол.

Конференциядағы ең өзекті әрі қызу талқыланған тақырыптардың бірі – инклюзивті білім беру мәселесі болды. Ерекше білім беру қажеттілігі бар балалардың ата-аналары мен осы саладағы сарапшылар қазіргі жүйенің мұндай оқушыларды толыққанды оқытуға әлі де дайын емес екенін айтты. Құрылтай депутаттығына кандидат, ерекше баланың анасы әрі тәжірибелі сарапшы Нұрия Балтабаеваның айтуынша, инклюзивті білім беру іс жүзінде білім беру ұйымдарының мойнына жүктелгенімен, олар қажетті мамандармен толық қамтамасыз етілмеген.

«Бүгінде инклюзивті білім беру мектептер мен балабақшалардың жауапкершілігіне жүктелгенімен, оларды қажетті кадрлық ресурстармен қамтамасыз ету мәселесі шешілмей отыр. Елде дефектологтар, логопедтер және тьюторлар тапшы. Ресми деректерге сәйкес, Қазақстанда ерекше білім беру жағдайларын қажет ететін шамамен 240 мың бала бар. Алайда шынайы көрсеткіш бұдан әлдеқайда жоғары. Денсаулық сақтау, Оқу-ағарту және Еңбек және халықты әлеуметтік қорғау министрліктері арасындағы үйлестірудің жеткіліксіздігінен қалада да, ауылда да мыңдаған бала білім беру үдерісінен тыс қалып отыр», – деді ЖСДП-ның мүшесі Нұрия Балтабаева.