Жылан шағуынан жыл сайын 500 мыңнан астам адам көз жұмуы мүмкін зерттеу

Әлемде улы жыландардың шағуынан болатын өлім-жітім ресми статистикада көрсетілгеннен әлдеқайда жоғары болуы мүмкін. Ғалымдардың жаңа есебіне сәйкес, жыл сайын 274 мыңнан 513 мыңға дейін адам көз жұмуы ықтимал, – деп хабарлайды Aikyn.kz сайты.

Зерттеу нәтижелері 30 қазанда жарияланды. Ғалымдар 79 елдегі мәліметтерді талдап, улы жылан шағуынан зардап шегетін адамдардың нақты санын анықтауға тырысқан.

Зерттеушілер 2025 жылғы 31 наурызға дейін жарияланған ғылыми еңбектерді, медициналық статистиканы және өңірлік деректерді пайдаланған. Ақпарат жеткіліксіз елдердегі жағдайды бағалау үшін климат, улы жыландардың таралуы және халықтың әлеуметтік жағдайы ескерілген математикалық модель қолданылған.

Есептеулерге сәйкес, әлемде жыл сайын кемінде 2,1 миллион адам жылан уынан зардап шегеді. Ал нақты көрсеткіш 7 миллионға дейін жетуі мүмкін.

Сонымен қатар жылан шағуынан аман қалған 800 мыңнан астам адам ұзақ мерзімді денсаулық мәселелеріне тап болуы ықтимал. Олардың арасында аяқ-қолынан айырылғандар және еңбекке қабілетін жоғалтқандар бар.

Зерттеу нәтижесі бойынша ең ауыр жағдай Сахараның оңтүстігіндегі Африка елдерінде байқалады. Бұл өңірге әлемдегі жылан уынан зардап шегу және өлім жағдайларының шамамен 45 пайызы тиесілі болуы мүмкін.

Ғалымдар мұны медициналық көмектің қолжетімсіздігімен, ауруханаға жетудің қиындығымен және жылан уына қарсы дәрілердің тапшылығымен байланыстырады.

Зерттеушілердің айтуынша, көптеген елде жылан шаққан адамдар медициналық мекемелерге жүгінбейді. Сондықтан мұндай жағдайлардың едәуір бөлігі ресми есепке алынбайды.

Дүниежүзілік денсаулық сақтау ұйымы 2030 жылға дейін жылан шағуынан болатын өлім мен мүгедектік көрсеткішін екі есе азайтуды мақсат етіп отыр.

Ғалымдар ұсынған сандар тіркелген өлім жағдайлары емес, қолда бар деректерге сүйеніп жасалған есептік бағалау екенін атап өткен жөн.