Жылыойда Қоғамдық кеңестен шығарылған үш азамат сотта жеңіске жетті

Атырау облысының Жылыой ауданында WhatsApp-та сын пікір білдіріп, отырыстарға қатыспағаны үшін Қоғамдық кеңестің үш мүшесі құрамнан шығарылды. Алайда олар мұнымен келіспей, сотқа жүгінді.

Бекет Құлбаев, Райса Телеубаева және Жолдас Қарашев биылғы 26 мамырда аудандық Қоғамдық кеңес мүшелігінен айырылды. Оның үстіне, оларды кеңес құрамынан шығару туралы шешімді әріптестері өздері қатыспаған отырыста қабылдаған.

Үшеуіне қатысты шағым аз болмаған. Кеңес мүшелерінің пікірінше, олар кеңестің беделіне нұқсан келтіріп, басқа WhatsApp топтарында оның жұмысы туралы теріс пікір қалыптастырған, өзге адамдардың сөздерін бұрмалап жеткізген және отырыстарға дәлелді себепсіз қатыспаған.

Осылайша, қызық жағдай қалыптасты. Тұрғындардың мүддесін білдіруге және мемлекеттік органдардың жұмысын бақылауға тиіс органның өзі өзіне айтылған сынға наразы болып шықты.

Кеңес құрамынан шығарылған азаматтар тағылған айыптармен келіспеді. Райса Телеубаева мен Жолдас Қарашев отырыстарға қатыса алмайтындарын алдын ала, тіпті сол WhatsApp арқылы хабарлағандарын айтты. Алайда әріптестері олардың түсініктемелерін ескерусіз қалдырған.

Ал «Қоғамдық кеңестер туралы» заңда кеңес мүшелерінің өкілеттігін мерзімінен бұрын тоқтатудың нақты негіздері қарастырылған. Соның бірі — бір жыл ішінде дәлелді себептерсіз отырыстарға үш реттен артық қатыспау. Ал кеңестің қызметін сынау немесе ол туралы теріс пікір қалыптастыру бұл тізімде жоқ.

Бекет Құлбаевтың кеңеспен арақатынасы бұдан да ертерек бұзылған. Ол 2025 жылғы 12 мамырдан бастап осы органның төрағасы болған. Алайда 2026 жылғы 20 сәуірде төрағалық қызметінен мерзімінен бұрын босатылды. Ал бір айдан кейін кеңес құрамынан да шығарылды.

Құлбаевтың пікірінше, бұл жағдайлардың артында Қоғамдық кеңестің қызметіне сыртқы ықпал ету әрекеттері тұруы мүмкін. Ол өзін төрағалық қызметінен шеттетуді де заңсыз деп санайды.

Ақырында, жанжалды шешу үшін сотқа жүгінуге тура келді. 19 қазанда Жылыой аудандық сотының судьясы Ж. Қонысбаев үш азаматтың талап арызын қарап, олардың талаптарын ішінара қанағаттандырды.

Сот 26 мамырдағы №9 хаттамалық шешімнің Құлбаевты, Телеубаеваны және Қарашевті Қоғамдық кеңес құрамынан шығару туралы бөлігін заңсыз деп танып, күшін жойды.

Дегенмен бұрынғы төраға үшін бұл оқиға әлі аяқталған жоқ. Сот шешімі тек кеңес құрамынан шығаруға қатысты болды, ал Құлбаевты төрағалық өкілеттігінен айыру мәселесі қаралған жоқ. Бұл шешім 20 сәуірдегі жеке хаттамамен рәсімделген.

Енді Құлбаев сотқа қайта жүгінбек. Бұл жолы ол өзін төраға қызметінен мерзімінен бұрын босату туралы шешімнің күшін жоюды талап етпек.

Ләззат ҚАРАЖАНОВА

Кеше, 17:09