БҰҰ Бас ассамблеясы 1 қазанды Халықаралық кофе күні деп жариялады

Біріккен Ұлттар Ұйымының Бас ассамблеясы 1 қазанды ресми түрде Халықаралық кофе күні деп жариялады, деп хабарлады БҰҰ сайты. 

Құжаттың авторлары қатарында ондаған мемлекет аталса, олардың ішінде Орта Азиядан Қырғызстан, Түрікменстан және Өзбекстан да бар.

Қарарда кофе өндірісі мен оны өңдеу саласының бірқатар тұрақты даму мақсаттарына қол жеткізуге қосатын үлесі атап өтіледі. Атап айтқанда, бұл – аштықпен күрес, шектен тыс кедейлікті азайту, әйелдердің құқықтары мен мүмкіндіктерін кеңейту, сондай-ақ лайықты еңбек пен экономикалық өсімді қолдау.

БҰҰ-ның Азық-түлік және ауыл шаруашылығы ұйымының (FAO) бас директоры Цюй Дунъюйдің айтуынша, кофе жай ғана сусын емес.

"Кофе – дәннен бастап дайын шыныаяққа дейінгі жаһандық сауданың маңызды бөлігі. Бұл сала миллиондаған фермерлік шаруашылықтардың күнкөріс көзі болып, ауылдық қауымдастықтарды әлемдік нарықтармен байланыстырады", – деді ол.

Кофе – әлемдегі ең танымал сусындардың бірі. Соңғы он жылда жан басына шаққандағы әлемдік тұтыну жылына орта есеппен 1,2 пайызға өсіп отырған. Бұл сала шамамен 25 миллион фермерге табыс әкеліп, қосылған құн тізбегінің барлық кезеңінде жұмыс орындарын қамтамасыз етеді.

Жалпы алғанда, әлемдік кофе индустриясының жылдық табысы 200 миллиард доллардан асады. Кофенің ірі экспорттаушылары Бразилия мен Вьетнам болса, негізгі импорттаушылар ретінде Еуропалық одақ пен АҚШ аталады.