Пранкшыл блогерлер Әкімшілік кодекстің қандай бабымен жазаланады

Мәжіліс депутаты Нартай Сәрсенғаиевтің "абыройды айрандай төгіп жүрген" пранкшыл блогерлердің жауакершілікке тарту жөніндегі сауалына ішкі істер министрі Ержан Сәденов жауап берді. 

Оның айтуынша, бұл мәселені шешу үшін Оқу-ағарту, Мәдениет және ақпарат министрліктерімен, сондай-ақ жастар ұйымдарымен бірлесіп, цифрлық мәдениет және Интернет желісіндегі қауіпсіз мінез-құлық мәселелері бойынша профилактикалық және түсіндіру жұмыстары тұрақты жүргізілуде. 

Пранк жасап, тәртіп бұзған блогерлердің басым бөлігі Әкімшілік кодекстің 434-бабына сәйкес, ұсақ бұзақылық үшін жазаланады. 

"Мысалы, биылғы қарашада интернет желісінде әдепсіз сөз сөйлегені үшін сот шешімімен "Мотиватор" деп аталатын блогер 15 тәулікке әкімшілік жауапкершілікке тартылды, лифтіде "мәйітті" қойып, балтамен шабуыл жасаған басқа да блогерлер ұсақ бұзақылық бойынша жауапқа тартылып, 15-30 тәулік мерзімге қамауға алынды", – деді Ержан Сәденов. 

Оның айтуынша, қолданыстағы заңнамаға сәйкес, құқыққа қайшы контент тарататын немесе Интернет желісі арқылы құқық бұзушылық жасайтын адамдарға қатысты жауапкершілік шаралары қолданылады.