"Инстаграмда әдемі көрінуі керек". Зумерлер 8 наурызға гүлді қалай таңдайды

Көктемнің алғашқы күндерімен бірге гүл базарында да қарбалас басталды. 8 наурыз мерекесі – гүл сатушылар үшін жылдағы ең табысты кезеңдердің бірі. Дәл осы уақытта букет бағасы күрт өсіп, сұраныс бірнеше есе артады. Қазақстанда қандай гүлдерге сұраныс жоғары? Олар қай жақтан әкелінеді? Ал гүл сыйлау мәдениеті қалай өзгеріп жатыр? Informburo.kz зерттеп көрді.

Қандай гүлдер трендте?

Флористердің айтуынша, 8 наурызда раушан, қызғалдық саудасы көш бастайды.

"8 наурызда ең өтімді гүл – раушан. Әсіресе қызыл, ақ және нәзік қызғылт түстер жақсы өтеді. Сонымен қатар көктемнің символы ретінде қызғалдаққа сұраныс өте жоғары. Соңғы жылдары момоко бақытгүлі, ранункулюс, сәлдегүлдер сәнге айналды. Соныман қатар былтырдан бастап амариллис, лалагүл пиязшығын сұрап, хабарласатындар көбейді. Бұл гүл топырақсыз, сусыз, ешқандай күтімсіз, өздігінен гүлдейді және бірнеше апта бойы гүлдеп тұрады", – дейді Safi гүл дүкенінің флорисі.

Фото: depositphotos.com

Мамандардың айтуынша, букеттің форматы да жыл өткен сайын өзгеріп келеді.

"Биыл минималистік стиль трендте. Бір түстегі моно-букеттер, табиғи орама, артық декорсыз композицияларды жиі сұрайды. Бірақ мереке кезінде үлкен әрі көлемді букеттер де сұраныстан түскен жоқ", – дейді ол.

Флористердің айтуынша, ер адамдар көбіне классикалық таңдауға тоқталады.

"Ер адамдар көбіне қызыл раушан немесе дәстүрлі үлкен букет алады. Ал жас жігіттер ерекше композицияларға, пастель түстерге және сәнді орамаға көбірек мән береді. Олар гүлдің эстетикасына, Pinterest-тегідей болуына, Instagram-да әдемі көрінуіне мән береді. Кейде саннан бұрын, сапасына, түстердің үйлесіміне назар аударады", – дейді маман.

Фото: pinterest.com Гүлдер қай жақтан әкелінеді?

Қазақстандағы гүл нарығы негізінен импортқа тәуелді. Energyprom.kz жазуынша, елдегі гүлдердің басым бөлігі шетелден жеткізіледі.

Қазақстан нарығындағы гүлдердің көбі Эквадордан келеді. Былтыр нарықтың 44%-ын осы жақтан келген гүлдер құраған. Ал екінші орында – Қытай. Жеткізу көлемі бойынша ол гүлдің "отаны" саналатын Нидерландты басып озды. Былтырғы қаңтар-желтоқсан айларында Қытайдан Қазақстанға 2,7 мың тонна гүл әкелініп, нарықтағы үлеесі бір жылда 8%-дан 21,5%-ға дейін өсті. Ірі экспорттаушылар қатарында Нидерланд (1,7 мың тонна), Колумбия (778 тонна) және Кения (739 тонна) да бар.

Ұлттық статистика бюросының дерегінше, Қазақстанға ең көп импортталатын гүлдердің арасында раушан гүлдері көш бастап тұр. Олар негізінен Эквадордан жеткізіледі. Сондай-ақ көктем мерекесі қарсаңында Беларусьтен, Нидерландтан қызғалдақтар әкелінеді.

Фото: pinterest.com

Дегенмен соңғы жылы Қазақстанда гүл импорты 11,2%-ға қысқарды. Соңғы жылдары елде жылыжай шаруашылықтары көбейіп, жергілікті гүл өндірісі дамып келеді. Әсіресе Алматы облысы мен оңтүстік өңірлерде гүл өсірумен айналысатын кәсіпорындар бар. Дегенмен мереке кезінде сұраныс бірнеше есе артатындықтан, ішкі өндіріс оны толық жаба алмайды.

Баға неге қымбаттайды?

8 наурыз – гүл бағасы ең жоғары деңгейге жететін кезеңдердің бірі. Әдетте 800-1500 теңге тұратын бір тал раушан мереке қарсаңында 2000-2500 теңгеге дейін бағалануы мүмкін. Қызғалдақтың бағасы да шамамен екі есеге өседі. Ал дайын букеттердің бағасы 10 мың теңгеден басталып, көлемі мен құрамына қарай қымбаттай береді. 

Сатушылар бағаның өсуіне бірнеше фактор әсер ететінін айтады. Ол:

мереке алдында сұраныстың күрт артуы; көтерме бағалардың қымбаттауы; логистика және жеткізу шығындары; валюта бағамының өзгеруі.

Алайда мереке қарсаңында гүл дүкендерінен бөлек, бір реттік табыс үшін қызғалдақ сатумен айналысатын адамдар да бар. Олардың бағасы нарықтағыдан сәл арзандау болады. Көбінесе, корпоративтік тапсырыстармен жұмыс істейді. 

Гүл сыйлау мәдениеті қалай өзгерді?

Флористердің айтуынша, соңғы уақытта гүл сыйлау себептері де өзгерген. Бұрын тек мереке күндері сауда қызса, қазір күнделікті кезде де гүл саудасы жақсы жүреді. Оған себепсіз гүл сыйлау мәдениетінің қалыптасып келе жатқаны да әсер етсе керек. Әлеуметтік желідегі "Себепсіз, себеп – сіз", "Сен менің бақытымсың бұйырмаған, бұйыр – маған" ашықхатымен гүл беру, жаңбырлы күні қолшатырға салынған гүл сыйлау трендтері – соның көрінісі. 

Bu gönderiyi Instagram'da gör

ЦВЕТЫ • ДОСТАВКА• КАРАГАНДА (@bantflowers_krg)'in paylaştığı bir gönderi

Сонымен қатар тұтынушылардың талғамы да өзгерген.

"Бұрын адамдар гүлдің санына көбірек мән беретін. Қазір керісінше стиль мен сапа маңыздырақ. Сондай-ақ алдын ала тапсырыс беру мәдениеті қалыптасып келеді. Бұрын 8-наурыз күні таңертең келіп, кезекте тұратындар көп еді", – дейді флорист.

Сонымен қатар соңғы жылдары қыздардың өз-өзіне гүл сыйлауы, өзін кездесуге шақыруы трендке айналып келеді. Әлеуметтік желіде #solodate, #selfdate хештегімен салынған суреттер мен хикаялар, өзіңмен өзің кездесу өткізуге арналған идеялар туралы жазбалар жиі жарияланатынын байқауға болады. 

Қандай гүл сыйлаған дұрыс?

Флористердің айтуынша, 8 наурызда гүл таңдағанда ең бастысы – сән емес, көңіл.

"Егер классикалық әрі әмбебап нұсқа керек болса – сапалы, үлкен, ұзын раушан немесе нәзік түсті қызғалдақ жақсы таңдау. Ал ерекше әсер қалдырғыңыз келсе, моно-букет немесе көктемгі аралас композиция алуға болады. Ең бастысы – гүлдің бағасы емес, оның шынайы көңілмен берілуі", – дейді флорист.

Bu gönderiyi Instagram'da gör

ЦВЕТЫ АЛМАТЫ | ДОСТАВКА ЦВЕТОВ (@eliteflowers.almaty)'in paylaştığı bir gönderi