1 қазаннан бастап қазақстандықтарға онлайн несие берілмес бұрын сұрақтар қойылады

1 қазаннан бастап қазақстандықтар кейбір онлайн-несиелерді рәсімдемес бұрын ақша алуды кім ұсынғаны және алаяқтардың арбауында емес пе екені туралы сұрақтарға жауап беруі тиіс. Жаңа талаптар банктер мен микроқаржы ұйымдары үшін күшіне енеді, деп хабарлайды Tengrinews.kz тілшісі.

1 қазаннан бастап не өзгереді?

Жаңа ереже Қаржы нарығын реттеу және дамыту агенттігінің биылғы 15 мамырда қол қойылған қаулыларында қарастырылған. Дегенмен жекелеген нормалар 1 қазанда ғана күшіне енеді.

Бұл талаптар интернет арқылы рәсімделетін және мүлік кепілімен қамтамасыз етілмеген тұтынушылық банк қарыздары мен микронесиелерге қатысты.

Шарт жасау алдында банк немесе микроқаржы ұйымы клиентке сауалнама жүргізуі қажет. Сауалнаманың мақсаты - ықтимал алаяқтықты анықтау немесе адамның үшінші тұлғалардың ықпалымен әрекет етіп жатқанын түсіну.

Қандай сұрақтар қойылады?

Сауалнама жеті сұрақтан тұрады.

Атап айтқанда, қарыз алушы несиені рәсімдеуді кім ұсынғанын көрсетуі керек: ол мұны өз бетінше шешті ме, таныстарының кеңесіне ерді ме, әлде "қауіпсіздік қызметінен", "полициядан" немесе басқа тұлғалардан қоңырау түсті ме?.

Сондай-ақ банктер мен микроқаржы ұйымдары мына жайттарды анықтайды:

адам несиені өз бетінше ме, әлде үшінші тұлғалардың өтініші бойынша рәсімдеп жатыр ма? ақша не үшін қажет - жеке мұқтаждықтарға ма, "шотты тексеру", "қате аударымды қайтару" немесе "қауіпсіз шотқа" аудару үшін бе? несие шарттарын - сомасын, мерзімін, пайыздық мөлшерлемесін және өтеу кестесін түсіне ме? оған біреу қысым көрсетіп, несиені тез арада рәсімдеуді талап етіп жатқан жоқ па? біреу несие алуды банк, микроқаржы ұйымы қызметкерлерінен немесе туыстарынан жасыруға кеңес бермеді ме? бұған дейін "ақшаны қорғау" немесе "шоттағы операцияларды тексеру" туралы ұсыныспен қоңырау түскен жоқ па? Банк алаяқтықты сезген жағдайда не болады?

Егер клиенттің жауаптары ықтимал алаяқтықты немесе адамның үшінші тұлғалардың ықпалымен әрекет ететінін білдірсе, қаржы ұйымы қарыз алу мән-жайына қосымша тексеріс жүргізуге міндетті.

Сонымен қатар клиентке ықтимал алаяқтық әрекеттерге байланысты тәуекелдер туралы қосымша түсіндіріледі.

Бұған дейін Ұлттық банк қарыз беруді реттейтін қаулысына өзгерістер енгізген болатын. Жаңа ереже 10 тамыздан бастап қолданысқа енді. Енді қарыз алу қиындай түседі - қазақстандықтардың өмірбаянындағы мәселелер ескеріледі.

Тағы оқыңыз: Алаяқтар атыңызға несие рәсімдеген: оны төлемеу үшін не істеу керек?

Бізді Google-дың негізгі дереккөздер тізіміне қосыңыз

Қосу