АҚШ та виза берілмес бұрын қазақстандықтарды қалай тексеретінін айтты

АҚШ-тың Алматыдағы Бас консулдығы әлеуметтік желілерде тараған видеоға қатысты түсініктеме берді. Онда АҚШ-тың Бас консулы ретінде таныстырылған ер адам Америка визасын беруден бас тарту себептері туралы айтқан, - деп хабарлайды Tengri Travel.

Видео миллионнан аса қаралым жинап, қолданушылар арасында қызу талқылау тудырды. Олардың көбі сұхбаттан өту тәжірибесін бөлісіп, виза беру туралы шешімнің нақты қалай қабылданатыны жайлы пікірталас жүргізді.

Редакция сауалына берген жауабында АҚШ-тың Алматыдағы Бас консулдығының пресс-атташесі Ингрид Корсгард визалық өтінімдерді қарау кезінде америкалық тарап қолжетімді ақпараттың барлық көлемін пайдаланатынын түсіндірді.

"Біз визаға өтініш берушілердің Америка Құрама Штаттарына баруға құқығы бар екеніне, АҚШ-тың иммиграциялық заңнамасын сақтайтынына және еліміз бен азаматтарымызға қауіп төндірмейтініне көз жеткізу үшін барлық қолжетімді ақпаратты пайдаланамыз. Сондай-ақ, виза алған тұлғаларды да осындай тексеруден өткізуді жалғастыра береміз", - деп хабарлады АҚШ-тың Алматыдағы Бас консулдығы.

Сондай-ақ, онда өтініш берушілерге виза процесі туралы ресми ақпарат көздеріне сүйенуге кеңес берілді.

"АҚШ визасын алу процесі туралы өзекті ақпаратты алу үшін travel.state.gov сайтына, сондай-ақ АҚШ-тың Алматыдағы Бас консулдығы мен Астанадағы АҚШ елшілігі ресми сайттарына кіруді ұсынамыз", - деді Ингрид Корсгард.

Сонымен қатар, консулдық трендке айналған видеодағы адамның АҚШ-тың Алматыдағы Бас консулы екені туралы ақпаратты жоққа шығарды.

"Біз видеода бейнеленген және мақалада аталған адамның АҚШ-тың Алматыдағы Бас консулы емес екенін растаймыз. Алматыдағы Бас консулымыздың суретін біздің сайттан таба аласыз", - деп хабарлады дипломатиялық миссиядан.

Талқылауға АҚШ-тың Бас консулы ретінде таныстырылған ер адамның визалық сұхбат қалай өтетінін және визадан бас тартуға не себеп болуы мүмкін екенін түсіндірген видеосы түрткі болды. Осы роликке негізделген жарияланымдарда консулдық қызметкерлер күн сайын өте көп өтініш берушіні қабылдайтындықтан, сұхбат әдетте небәрі екі-үш минутқа созылатыны айтылған.

Сондай-ақ видеода виза беру туралы шешім, ең алдымен, өтініш берушінің өзімен бірге алып келген құжаттарына емес, сұхбат кезіндегі жауаптарына негізделеді делінген. Сөйлеушінің айтуынша, ең маңыздысы - шынайы жауаптар мен сенімді ақпарат.

Жалған құжаттар ұсыну немесе консулдық қызметкерді әдейі жаңылыстыру әрекеті визадан бас тартуға әкелетіні ерекше атап өтілді. Роликте айтылғандай, кей жағдайларда бұл АҚШ-қа кіруге өмір бойына тыйым салуға негіз болуы мүмкін.

Видео жарияланғаннан кейін пікір қалдыру бөлімінде қолданушылар америкалық виза алу тәжірибелерін белсенді талқылай бастады.

Бірі сұхбат кезінде оларға небәрі бірнеше сұрақ қойылып, құжаттарын көрсетуді мүлдем сұрамағанын айтса, екіншілері, керісінше, құжаттар мұқият зерттелгенін, ал шешім, олардың пікірінше, сұхбат басталмай тұрып-ақ қабылданғанын алға тартты. Кейбір қолданушылар ұзақ сұхбатсыз-ақ визадан бас тартуға тап болғандарын жазды.

Instagram-дағы бұл жарияланымды көру

TV3 Ghana (@tv3_ghana) жарияланымы

Біз түпнұсқа видеоны таба алдық. Ол өткен жылдың 9 мамырында АҚШ-тың Ганадағы елшілігінің жұмысына арналған кездесуден кейін жарияланған. Роликте сол кезде АҚШ-тың Ганадағы Бас консулы қызметін атқарған Эллиот Фертик (Elliot Fertik) сөйлеп тұр.

Google News арқылы жаңалықтарымызды қадағалаңыз