Қазақстанда 31 желтоқсан демалыс күні бола ма

Жаңа жыл алдындағы қарбалас жақындаған сайын қазақстандықтарды әдеттегідей "31 желтоқсан демалыс күні бола ма?" деген сұрақ мазалайтыны анық. Еңбек және халықты әлеуметтік қорғау министрлігі бұл мәселеге қатысты ресми жауап берді. Түйіндей айтсақ: демалуға болады, бірақ оның өз ерекшеліктері бар, деп хабарлайды Tengri Life.

Неге 31 желтоқсан ресми мереке емес?

Еңбек министрлігінің түсіндіруінше, "Мерекелер туралы" Заңға сәйкес, тек ұлттық және мемлекеттік мерекелер ғана демалыс күндері болып жарияланады.

Әрбір мұндай дата - жай ғана қосымша демалыс күні емес, маңызды тарихи, мәдени немесе қоғамдық-саяси оқиғаларға арналған күн. Олар дәстүрлерді сақтауға және ұлттық бірегейлікті нығайтуға көмектесе отырып, идеологиялық және тәрбиелік мәнге ие болады.

Жаңа жыл (1–2 қаңтар) - мемлекеттік мереке, ал 31 желтоқсан заңмен белгіленген ұлттық және мемлекеттік мерекелерге жатпайды. Сондықтан бұл күн автоматты түрде демалыс болып есептелмейді.

Міндетті түрде жұмыс істеу керек пе?

Қолданыстағы еңбек заңнамасы жұмыс берушілерге қызметкерлердің жағдайын жасау үшін толық еркіндік береді. Ол үшін заңдарға өзгеріс енгізуді күтудің қажеті жоқ - мәселені компания ішінде шешуге болады.

Компания қызметкерлерді 31 желтоқсанда қалай ресми түрде босата алады:

Қысқартылған күн: жұмыс уақытын бірнеше сағатқа азайту. Икемді кесте: бұл сағаттардың орнын бір ай ішінде алдын ала өтеуге рұқсат беру. Толық демалыс күні: 31 желтоқсанды ұжымдық шарт немесе жұмыс берушінің ішкі актісі арқылы қосымша мерекелік/демалыс күні ретінде бекіту.

Анықтама: Егер сіздің компанияңызда ұжымдық шарт қабылданған болса, 31 желтоқсанды корпоративтік демалыс күндерінің тізіміне енгізу туралы ұсыныс тастай аласыз.

2027 жылы демалыс күндері ауыстырыла ма?

Еңбек министрлігі 2027 жылы демалыс күндерін басқа жұмыс күндеріне ауыстыру мәселесі қарастырылып жатқанын хабарлады.

Әзірге ауыстырудың түпкілікті кестесі айқындалған жоқ. Ол бекітілгеннен кейін жыл ішіндегі, оның ішінде желтоқсанның аяғындағы демалыс күндерінің қалай бөлінетіні белгілі болады.

Мәлім болғандай, қазақстандықтар демалыс күнін ауыстыру мәселесін бірнеше жылдан бері көтеріп келеді. Олар 31 желтоқсанды демалыс күні етіп, қаңтардағы мереке күндерінің бірін жұмыс күніне ауыстыруды ұсынады. Бастама авторлары жылдың соңғы күнінде көптеген ұйымда бәрібір толыққанды жұмыс жүргізілмейтінін алға тартады.

Қазақстандықтар 2026 жылы қанша күн демалады - мереке күнтізбесі

Бізді Google-дың негізгі дереккөздер тізіміне қосыңыз

Қосу