Отбасының әл ауқаты қалай анықталады: министрлік түсіндіріп берді

АЛМАТЫ, 15 қазан - Sputnik. Қазақстанда отбасылар мен үй шаруашылықтарының материалдық жағдайын бағалау кезінде олардың әл-ауқатын көрсететін бірнеше көрсеткіш ескеріледі, деп хабарлайды Еңбек министрлігі.
А санатына әл-ауқаты жоғары отбасылар, ал Б санатына ауқатты отбасылар жатады.
Санатты анықтаған кезде отбасының табысы ғана емес, жылжымайтын мүлкі, көлігі, кәсібі, жер учаскелері және басқа да активтері ескеріледі.
А санатына әр отбасы мүшесіне шаққандағы табысы 7 күнкөріс минимумынан асатын, үлкен аумақты жылжымайтын мүлкі, люкс санатындағы көлігі, бизнесі және басқа да активтері бар отбасылар жатады.
Ал Б санатына әр адамға шаққандағы табысы 6-дан 7 күнкөріс минимумына дейінгі, жайлы баспанасы, премиум санатындағы көлігі, кәсіпкерлік қызметі және басқа да мүлкі бар отбасылар кіреді.

Алайда осы белгілердің біреуінің болуы отбасы автоматты түрде белгілі бір санатқа жатқызылады дегенді білдірмейді, дейді министрлік.

"Отбасының әл-ауқаты Отбасының цифрлық картасы арқылы 50-ден астам өлшем негізінде бағаланады. Олардың қатарында табыс деңгейі, жұмыспен қамтылуы, мүлкі, несиелері және әлеуметтік жағдайы бар", - делінген хабарламада.

Сонымен қатар отбасының санаты тұрақты болып қалмайды. Өмірлік жағдайы өзгерсе, санаты да қайта қаралуы мүмкін.