Су үнемдеу технологияларын жасайтын отандық зауыттардың саны артты

Қазақстанда шаруалардың су үнемдейтін жабдықтарға деген қажеттілігін қамтамасыз ету мақсатында жаңбырлатып суару машиналары мен тамшылатып суару жабдықтарын жасайтын жеті отандық зауыт жұмыс істейд, – деп хабарлайды Aikyn.kz. Оның үшеуі Түркістан облысында, екеуі Астана қаласында, бір-бірден Атырау облысы мен Алматы қаласында орналасқан. 2025 жылы елде бес зауыт жұмыс істесе, 2024 жылы олардың саны төрт болған.

Қолданыстағы кәсіпорындардың жалпы өндірістік қуаты жылына 3 390 жаңбырлатып суару машинасын шығаруға жетеді. Бұл шамамен 205 мың гектар жерді суаруға мүмкіндік береді. Жедел мәліметтерге сәйкес, биыл ауыл шаруашылығы тауарын өндірушілер жалпы 82,5 мың гектар жерді суаруға арналған шамамен 1 010 жаңбырлатып суару машинасын сатып алған.

Сонымен қатар шетелдік инвестиция тарту бағытында да белсенді жұмыс жүргізіліп жатыр. Мәселен, Қостанай облысында америкалық жаңбырлатып суару машиналарын жергілікті жерде өндіру жобасы іске қосылды. Осындай жоба Қарағанды облысында да жүзеге асырылып жатыр.

«Биыл жыл басынан бері су үнемдеу технологиялары қосымша 158 мың гектар суармалы жерге енгізілді. Нәтижесінде заманауи суару жүйелері қолданылатын алқаптардың жалпы көлемі шамамен 702,3 мың гектарға жетті. Сондай-ақ суару суын субсидиялау қағидаларына өзгерістер енгізілді. Атап айтқанда, субсидияланатын су үнемдеу технологияларының тізбесіне лазерлік тегістегіш қосылды», - деді Су ресурстары және ирригация вице-министрі Талғат Момышев.

Еске салайық, Су ресурстары және ирригация министрлігі ауыл шаруашылығы тауарын өндірушілердің су үнемдеу жүйелерін сатып алу және орнату шығындарының өтелетін үлесін 50%-дан 80%-ға дейін ұлғайтты. Ал мұндай жүйелерді пайдаланған жағдайда суару суына берілетін субсидия мөлшері 85%-ға дейін арттырылды.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.