1 шілдеден бастап қандай өзгерістер күшіне енеді?

Сурет ЖИ көмегімен жасалды

Енді азаматты тұрғын үйінен шығару немесе баспанасынан айыру тек сот шешімі арқылы жүзеге асырылады. Мәселен, егер жалға алушы үйді босатудан бас тартса, меншік иесі алдымен сотқа жүгінуге міндетті. Мәжбүрлеп көшіру соттың заңды шешімінен кейін ғана жүргізіледі. Бұған дейін де осындай тәртіп болғанымен, енді бұл талап Конституция деңгейінде бекітілді.

Мамандар тұрғын үйді жалға беру кезінде тараптардың міндеттері мен жауапкершілігі нақты көрсетілген жазбаша келісімшарт жасаудың маңызын ескертеді. Бұл даулы жағдайлардың алдын алуға мүмкіндік береді.

Жаңа Конституция күшіне енді: Теңге ресми конституциялық мәртебеге ие болды

1 шілдеден бастап елімізде жаңа Құрылыс кодексі де қолданысқа енгізілді. Соған сәйкес әрбір тұрғын үй кешеніне құрылыс барысын бақылауға арналған бірегей нөмір беріледі. Сонымен қатар құрылыс салушылар мен мердігерлерге қойылатын талаптар күшейтіліп, ғимараттардың негізгі көтергіш конструкцияларына берілетін кепілдік мерзімі 10 жылға дейін, ал басқа элементтерге 5 жылға дейін ұзартылды. Бұдан бөлек, құрылыс жобаларында сейсмикалық қауіптерді бағалау міндеттеліп, тұрғындарға өз аудандарындағы құрылыс жобаларын талқылауға қатысу мүмкіндігі беріледі.

Сондай-ақ елді мекендерді абаттандыру қағидалары жаңартылды. Енді жеке тұрғын үй иелері өз үйлерінің маңын қоқыстан тазартып, арамшөптерді орып, жасыл желектерді күтіп-баптауға, қоршау мен қасбетті таза ұстауға міндетті. Іргелес аумақтың қоқысқа немесе құрылыс материалдарына толып кетуі заңбұзушылық болып саналады.

Мұндай талаптарды сақтамаған азаматтарға Әкімшілік құқық бұзушылық туралы кодекстің 505-бабы бойынша жауапкершілік қарастырылған. Алғаш рет ереже бұзғандарға ескерту жасалса, бір жыл ішінде қайталанған жағдайда 30 айлық есептік көрсеткіш, яғни 2026 жылғы мөлшер бойынша 129 750 теңге көлемінде айыппұл салынады.

«Конституция негіздері», «Жеке қауіпсіздік»: Мектеп бағдарламасына жаңа пәндер енгізіледі

Ал ипотекалық несие беру тәртібі әзірге өзгеріссіз қалды. Қазір де қарыз алушының барлық несие бойынша ай сайынғы төлемі табысының 50 пайызынан аспауға тиіс. Бұған дейін ипотека бойынша жылдық тиімді сыйақы мөлшерлемесін бастапқы жарна көлеміне қарай өзгерту жоспарланған еді. Алайда бұл жаңашылдық келесі жылға шегерілді. Сонымен қатар болашақта қарыз алушының төлем қабілетін бағалау кезінде тек ай сайынғы төлем ғана емес, оның жалпы берешек көлемі де ескерілмек.

Еске салайық, кеше елімізде жаңа Конституция күшіне енді. Мемлекет басшысы Қасым-Жомарт Тоқаев Жаңа Конституцияның күшіне енуіне орай үндеу жасады. Президент бұл еліміз үшін айрықша маңызды оқиға екенін атап өтіп, тәуелсіз Қазақстан тарихының жаңа дәуірі басталғанын айтты.