15 пышақ жарақаты: Семейде екі оқушы арасында не болды

Семейде 13 жастағы оқушы 15 жерінен пышақ жарақатын алып, ауруханаға түсті. Ол жарақаттарды досы болуы мүмкін құрдасымен жанжалдасу кезінде алғаны айтылды. Өңірлік полиция оқиғаның мән-жайын анықтап жатыр, деп хабарлайды Tengrinews.kz.

Оқушылар арасында не болған?

Алдын ала мәлімет бойынша, 13 жастағы екі оқушы арасындағы жанжал кезінде олардың біріне 15-ке жуық пышақ жарақаты салынған. Жасөспірім ауыр халде ауруханаға жеткізіліп, оған күрделі ота жасалды.

Дәрігерлер жасөспірімнің өмірін сақтап қалды. Қазір ол ауруханада жатыр.

Екінші оқушы да медициналық мекемеге жеткізілді. Жарақаттары таңылғаннан кейін ол үйіне жіберілді.

Жасөспірімдер оқитын мектеп өкілдері КТК арнасына екі баланың да бұған дейін тәртіп бұзушы ретінде есепте тұрмағанын айтты. Екеуі де бір сыныпта оқыған және жақын дос болған.

Абай облысы ПД 10 қыркүйекте полицияға дене жарақатымен екі кәмелетке толмаған баланың ауруханаға түскені туралы хабарлама келгенін мәлімдеді.

"Аталған факті бойынша сотқа дейінгі тергеу амалдары жүргізіліп жатыр, оның аясында оқиғаның барлық мән-жайы анықталады", - деп хабарлады ведомство.

ПД тергеу қорытындысы бойынша жасөспірімдерді профилактикалық есепке қою, сондай-ақ олардың заңды өкілдерін бала тәрбиесіндегі міндеттерін тиісінше орындамағаны үшін жауапқа тарту мәселесі қаралатынын атап өтті.

Бізді Google-дың негізгі дереккөздер тізіміне қосыңыз