22 пышақ жарақаты: Павлодарда кәсіпкер 15 жылға сотталды

Павлодарда кәсіпкер 52 жастағы серіктесі Асұлан Нұрмағамбетовті аса қатігездікпен өлтіру ісі бойынша сотталды. Сотталушы 15 жылға бас бостандығынан айырылды, деп хабарлайды Tengrinews.kz тілшісі.

Қоғамда резонанс тудырған процесс Павлодар облысының қылмыстық істер жөніндегі мамандандырылған ауданаралық сотында аяқталды. 44 жастағы кәсіпкер Қылмыстық кодекстің 99-бабы 2-бөлігі "Аса қатігездікпен жасалған адам өлтіру" бойынша кінәлі деп танылды.

"Сотталушының кінәсі толық дәлелденді. Жеңілдетілген мән-жайлардың жиынтығы және ауырлататын мән-жайлардың болмауы сотқа 15 жылға бас бостандығынан айыру жазасын тағайындауға мүмкіндік берді. Аталған бапта осындай мерзім қарастырылған", - деп түсіндірді іс бойынша төрағалық етуші судья Айнұр Жүсіпова.

Судья Айнұр Жүсіпова. Фото сот залынан Tengrinews.kz

Сондай-ақ сотталған азамат жәбірленуші тарапқа 12 миллион теңге көлемінде моральдық шығын төлеуге міндеттелді, оның ішінде 8 миллион теңге марқұмның әйеліне беріледі.

Сотталған адам жазасын қылмыстық-атқару жүйесінің орташа қауіпсіздік мекемесінде өтейді. Сот үкімі заңды күшіне енген жоқ.

Қаза тапқан кәсіпкердің жақындары сот шешіміне шағым түсіруге ниетті екені белгілі болды.

"Мен бұл жазамен келіспеймін және ұзақ мерзімге сотталуын талап етемін. Тергеу изоляторында бір күн бір жарым күн болып есептеледі, яғни ол 15 жылдың екі жылын өтеп қойды. 13 жыл өте аз деп есептеймін. Ол менің бауырымды аяған жоқ. Оған 22 рет пышақ салған. Сау тамтығын қалдырмаған", - деді үкім жарияланғаннан кейін марқұмның әпкесі Гүлжиһан Рыспаева.

Әйел үкім кесу рәсіміне бауырының суретін алып келді

Гүлжиһан Рыспаеваның айтуынша, бауыры Асұлан Нұрмағамбетов құрылыс бизнесімен айналысқан.

Тергеу нұсқасы бойынша, серіктесімен арада қаржылық келіспеушіліктер туындаған. Мәселе 84 миллион теңгеге қатысты болған. Былтыр ақпанда кәсіпкерлер гаражда кездескен, кейін жоғалып кетіп, іздеуде болған Асұлан Нұрмағамбетовтің мәйіті сол жерден табылған.

"Сотталушы сотта болған жағдайға өкінетінін, Асұлан екеуі дос болғанын айтты. Не істегенін түсінбегенін алға тартты. Бірақ ол гараждағы бейнекамераны қолғаппен жауып тастаған, демек, алдын ала дайындалған. Сотта бауырымның қарызы болмағаны айтылды", - дейді марқұмның әпкесі.

Еске сала кетейік, павлодарлық кәсіпкер Асұлан Нұрмағамбетов 2025 жылдың ақпанында жұмысқа бара жатқан жолда жеке көлігімен жоғалып кеткен. Оның мәйіті екі тәулікке жуық жалғасқан іздеу шараларынан кейін табылды. Іздеу жұмыстарына полицейлермен бірге еріктілер, Ұлттық ұлан сарбаздары және бейжай қарамаған павлодарлықтар қатысты.

Ресейде бизнестегі серіктесін өлтірді деген күдікпен қазақстандық ұсталды

Сол жылдың наурызында құқық қорғау органдары күдікті Ресейде, Красноярск өлкесінде ұсталғанын хабарлады. Ол Нұрмағамбетовтің өңірде жарма өндірумен және астық саудасымен айналысатын әріптесі болып шықты.

Бастапқыда бұл іс адам өлтіру дерегі бойынша тергелді, кейін марқұмның жақындары істі неғұрлым ауыр бапқа қайта саралауға қол жеткізді.

Бізді Google-дың негізгі дереккөздер тізіміне қосыңыз