“20 миллионды қолма қол берді“. Ұлдана Мырзуанның жесірі алған ақшасы туралы айтты

Астана сотында жедел жәрдем фельдшері Ұлдана Мырзуанның өліміне қатысты іс бойынша сот талқылауы жалғасып жатыр. Бүгін марқұмның күйеуі Әділет Зейнел жауап берді, деп хабарлайды Tengrinews.kz тілшісі.

Жәбірленушінің айтуынша, жұбайын жерлегеннен кейін бірден оны Ұлдананың туған әпкесімен бірге елорда әкімдігіне шақырған.

"Кездесуге Астана әкімі, оның орынбасары және мәслихат депутаттары қатысты. Әкімдік депутаттар мен қалғандарынан көмек сұрады. Бірінші болып мәслихат депутаты үн қатты, аты-жөні есімде жоқ. Ол бұл ақшаны, 20 миллион теңгені өз қолымен тапсырды. Қолма-қол берді. Ешқандай қолхат жазбадық, ештеңеге қол қойған жоқпыз, ол жерде журналистер болған жоқ. Мен ол жаққа Ұлдананың туған әпкесі Ақнұрмен бірге бардым. Екеуіміз бірге болдық", - деді Әділет Зейнел.

Ол ақшаны әкім емес, аты-жөнін білмейтін депутат бергенін атап өтті.

Сондай-ақ марқұмның күйеуі ақша қалай жұмсалғанын айтып берді.

"Үш күн ішінде көліктің несиесін төледім. Кейін банкке бардық. Ол жерде Ұлдананың шоттары толығымен бұғатталғанын, несиелерді тек 6 айдан кейін жабуға болатынын айтты. Алдын ала сома - шамамен 4 миллион 300 мың теңге (...) Қалған 9 миллион 200 мың теңгені көлік несиесіне жұмсадық, кейін 4 миллион 500 мың теңге Ұлдананың анасына берілді. Содан кейін құдайы тамақ, қой сою сияқты ұсақ-түйек шығындарға кетті", - деді ер адам.

Сондай-ақ жәбірленуші жерлеу рәсімін ұйымдастыру мен шығындарын Ұлдана жұмыс істеген жедел жәрдем қосалқы станциясы мен оның директоры толықтай өз мойнына алғанын хабарлады.

Бүгін фельдшер Ұлдана Мырзуанның күйеуі Әділет Зейнел сотта жауап берді. Ер адам жұбайы қайғылы жағдайға тап болған күннің мән-жайын айтып берді. Сондай-ақ ол сотқа жұбайының қазасы туралы қалай білгенін хабарлады.

18 тамызда Астананың қылмыстық істер жөніндегі ауданаралық сотында фельдшер Ұлдана Мырзуанның өліміне қатысты іс бойынша алдын ала тыңдау басталды. Істі судья Меруерт Абаева жүргізіп жатыр.

Процеске екі мемлекеттік айыптаушы Нұрдәулет Әбуов пен Саяжан Серікова, қаза тапқан фельдшер Ұлдана Мырзуанның анасы Сәлима Омарова және марқұмның жұбайы Әділет Зейнел қатысуда.

Бұған дейін оның адвокаты Мұрат Мәуметов журналистерге Әділет Зейнелдің жәбірленуші мәртебесінен Ұлдананың анасының пайдасына бас тартатынын айтты. Алайда кейіннен сот бұл өтінішті қанағаттандырудан бас тартты. Зейнелдің өзі журналистерге қандай да бір түсініктеме беруден бас тартты.

Сотталушылар орындығында қайғылы оқиға болған үйдің МИБ төрайымы Сәуле Жұбаниязова отыр. Өткен сот отырысында ол өзін кінәсіз деп санайтынын мәлімдеді.

Ұлдананың анасының адвокаты Нұрсұлтан Орынбековтің айтуынша, іс Қылмыстық кодекстің 254-бабы – "Міндеттерге адал қарамау" бойынша қаралып жатыр.

Тікелей көрсетілімді YouTube-арнамыздан көруге болады.

2025 жылғы 8 қарашада Астанада Тәуелсіздік даңғылы, 24 Б мекенжайындағы тоғыз қабатты үйдің қасбетінен кірпіш қаптама құлаған. Салдарынан бес адам зардап шекті. Олар №1 көпбейінді ауруханаға жатқызылды.

Бір пациенттің жағдайы өте ауыр болды, оған ота жасалды. Тағы екі адам жансақтау бөлімінде жатты, дәрігерлер олардың жағдайын ауыр деп бағалады. Қалған екі адам бөлімшеге орналастырылды, олардың жағдайы тұрақты деп бағаланды.

Ең ауыр жарақат алған пациент - оқиға орнына жеткен жедел жәрдем фельдшері, 23 жастағы Ұлдана Мырзуан болып шықты. Қыздың туыстарының айтуынша, ол зардап шеккендерге алғашқы болып көмекке ұмтылған. Олардың арасында бала, оның анасы және туысы болған. Ұлдана зардап шеккендерге қарай жүгірген кезде, "үстіне кірпіш мен кондиционердің бекіткіші құлаған". 18 қарашада ол ауруханада көз жұмды.

Оқиғадан кейін полиция Қылмыстық кодекстің 278-бабы "Сапасыз құрылыс" бойынша қылмыстық іс қозғады. Кейін істе тағы бір бап пайда болды – 306-бап "Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтерді көрсету".

Президент Қасым-Жомарт Тоқаев Ұлдана Мырзуанды ерлігі, жанқиярлығы және міндетін үлгілі атқарғаны үшін "Ерлігі үшін" медалімен марапаттады. Қазақстандықтар жедел жәрдем фельдшерімен қалай қоштасқаны туралы мына материалда.

Google News арқылы жаңалықтарымызды қадағалаңыз