Фельдшер Ұлдана Мырзуанның жесірі журналистердің сұрақтарына жауап беруден бас тартты

Қаза тапқан фельдшер Ұлдана Мырзуанның күйеуі Әділет Зейнел журналистердің сұрақтарына жауап беруден бас тартты. Ол сотқа жәбірленуші ретінде қатысып жатыр, деп хабарлайды Tengrinews.kz тілшісі.

Бүгін Астананың қылмыстық істер жөніндегі мамандандырылған ауданаралық сотында фельдшер Ұлдана Мырзуанның өліміне қатысты іс бойынша алдын ала тыңдау басталды.

Істі судья Меруерт Абаева жүргізіп жатыр.

Процеске екі мемлекеттік айыптаушы Нұрдәулет Әбуов пен Саяжан Серікова, марқұм фельдшер Ұлдана Мырзуанның анасы Сәлима Омарова және жұбайы Әділет Зейнел қатысып жатыр. Соңғысы БАҚ өкілдерінің сұрақтарына жауап беруден бас тартты.

Оның адвокаты Мұрат Мәуметов қаза тапқан Ұлдананың отбасы мен күйеуі арасындағы барлық қаржылық және мүліктік даулар шешілгенін мәлімдеді.

Еске сала кетейік: сотталушылар орындығында қайғылы оқиға болған үйдің МИБ төрағасы отыр. Ұлдананың анасының адвокаты Нұрсұлтан Орынбековтің журналистерге хабарлауынша, іс Қылмыстық кодекстің 254-бабы – "Міндеттерге адал қарамау" бойынша қаралып жатыр.

Кейін Жоғарғы сот Ұлдана Мырзуанның өліміне қатысты сот процесі тікелей эфирде өтетін хабарлады.

Еске салайық, 2025 жылғы 8 қарашада Астанадағы Тәуелсіздік даңғылы, 24 Б мекенжайында орналасқан тоғыз қабатты үйдің қасбетінен кірпіш қаптама құлаған. Салдарынан бес адам зардап шекті. Олар №1 көпбейінді ауруханаға жатқызылды.

Бір пациенттің жағдайы өте ауыр болып, оған ота жасалды. Тағы екеуі жансақтау бөлімінде жатты, дәрігерлер олардың жағдайын ауыр деп бағалады. Қалған екеуі бөлімшеге ауыстырылды, олардың жағдайы тұрақты деп бағаланды.

Ең ауыр жарақат алған пациент - оқиға орнына жеткен жедел жәрдем фельдшері, 23 жастағы Ұлдана Мырзуан болып шықты. Қыздың туыстарының айтуынша, ол зардап шеккендерге алғашқы болып көмекке ұмтылған. Ол жерде бала, оның анасы және олардың туысы болған. Ұлдана зардап шеккендерге қарай жүгірген кезде, "үстіне кірпіштер мен кондиционердің бекіткіш құрылғысы құлаған". 18 қарашада ол ауруханада қайтыс болды.

Оқиғадан кейін полиция Қылмыстық кодекстің 278-бабы "Сапасыз құрылыс" бойынша қылмыстық іс қозғады. Кейінірек істе тағы бір бап пайда болды – 306-бап "Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтерді көрсету".

Президент Қасым-Жомарт Тоқаев Ұлдана Мырзуанды ерлігі, жанқиярлығы және міндетін үлгілі атқарғаны үшін "Ерлігі үшін" медалімен марапаттады. Қазақстандықтар жедел жәрдем фельдшерімен қалай қоштасқаны туралы біздің материалда.

Фото: ©️ Tengrinews.kz / Айсұлтан Құлшманов

Бұған дейін ІІМ тергеу амалдары жалғасып жатқанын және ведомство тағайындалған сараптама қорытындыларын күтіп отырғанын мәлімдеген болатын.

Google News арқылы жаңалықтарымызды қадағалаңыз