2025 сіз үшін қандай жыл болды?

Ұлттық талдау орталығы дәл осы сұрақтың жауабын іздеп көрді. Елдің әр өңірі қамтылып, мың респонденттің қатысуымен жалпыұлттық сауалнама өткізілді. Нәтижесінде, оң бағалардың теріс пікірлерден 3,5 есе басым екені байқалды.

«Қайрат» пен «Реал Мадрид» арасындағы тарихи матч. Көпшілік осы бір ойынды биылғы жылдың басты жаңалығы санайды. Бірі әлемдік жұлдыздарды көрдік десе, бірі Қайраттың биылғы маусымдағы жанкештілігіне тәнті болдық дейді. Тіпті Мадридтік Реалдың бас бапкері де Қайратты жоғары бағалаған болатын.

Хаби Алонсо, «Реал Мадрид» клубының бас бапкері:

- Біз Чемпиондар лигасының ойыны алматылықтар үшін қаншалықты маңызды екенін көрдік. «Қайрат» кездесудің басында өте жақсы ойнады. Ал біз керісінше, бұл алаңда өзімізді жайсыз сезіндік және алғашқы минуттарда командалық ойын көрсете алмадық. Алайда пенальтиден кейін менің командам жақсы ойнай бастады. Жалпы мен «Қайрат» футболшыларының жанкештілігіне риза болдым.

2025 жылдың ең жарқын әрі жағымды оқиғаларына әлемдік жұлдыздардың концерті мен түрлі мерейтойлық шаралар қосылды. Яғни 25 мың көрермен жинаған Жей Лоның ән кеші, Алатау мен Сарыарқаны әнге бөлеген Backstreet Boys жастардың есінде қалған.

Дауыс берушілер Семейде 12 күн тойланған Абайдың 180 жылдығы мен Жеңістің 80 жылдығын да 2025-тің басты оқиғаларына қосқан.

Жанжігіт Омархан, Абай облысының мәдениет, тілдерді дамыту және архив ісі басқармасының басшысы:

- Оң оқиғалар жыл бойы тек көңіл-күйдің көтерілуін ғана емес, елдің білім беру, денсаулық сақтау, экология және технологиялар сияқты негізгі салаларында да нақты өзгерістер мен жетістіктердің бар екенін көрсетеді. Мәселен, дауыс берушілер бұл тізімге Президенттің халықаралық деңгейдегі кездесулері мен жасанды интеллект саласындағы ірі жетістіктерді қосқан.

Ерзат Дулат, Higgsfield AI негізін қалаушы:

- Higgsfield AI жасанды интеллект көмегімен видео мен суреттің анимациясын жасайтын отандық платформа. Стартаптың құрылғанына небәрі екі жыл. «Соған қарамастан бұл – салада 15 жылда ешкім жетпеген жетістікке жетті. Бүгінде Higgsfield AI өнімінің екі млн-нан астам қолданушысы бар.

Ұлттық талдау орталығы жүргізген сауалнамаға сүйенсек, дауыс берушілердің 71 пайызы елдің дұрыс бағытта дамып келе жатқанын атап өтті. Көпшілік бұл деректі мемлекеттік саясаттың тұрақтылығымен байланыстырады. Сондай-ақ қазақстандықтардың 77 пайызы Мемлекет басшысының қызметін қолдайтынын білдірді. Қазір халық арасында елдің даму бағыты мен Президентке деген сенім жоғары. Яғни қоғамда мемлекет саясатына қатысты біртұтас көзқарас қалыптасып отыр.

Авторы: Әлішер Әли