2025 жылы қандай қайғылы оқиғалар болды?

Qazaq24.com, Egemen.KZ дереккөзінен алынған мәліметтерге сүйене отырып жаңалық жариялады..

2025 жылы қоғамға ауыр әсер еткен оқиғалар аз болмаса керек. Адам өлімімен аяқталған ірі жол-көлік апаттары (ЖКО) жиіледі. Кейбір өндіріс орындарында адам өліміне әкелген апаттар тіркелді. Сонымен қоса, әйелдер мен балаларға қатысты зорлық-зомбылық оқиғалары да болды және жастар арасында суицид оқиғалары тіркелді. Бұның бәрі әлеуметтік қорғау, денсаулық сақтау, қауіпсіздік, психологиялық қолдау салаларын күшейту қажеттігін көрсетті, деп жазады Egemen.kz.

Фото: ЖИ

Алапат өрт 12 адамды жалмап кеткен

Түркістан облысында қос қабатты баспана отқа оранып, 12 адам көз жұмды. Қайғылы оқиға 18 қарашада Жетісай ауданындағы Алғабас ауылында болғаны мәлім. Қаза тапқандардың бәрі бір әулеттің мүшелері. Көрші ауылдағы туысының тойынан қайтқан қонақтар бауырының үйіне түнеп шықпақшы болған. Алайда таң ата тұтанған тілсіз жау әп-сәтте бүкіл баспананы шарпыған. Үйде болған 15 адамның тек 3-еуі ғана тірі қалды. 18 жастағы қыз, әйел адам және ер адам аудандық аурухананың жансақтау бөліміне жатқызылған.

Өрт таңғы сағат 5-тен өте тұтанған. Қызыл жалын әп-сәтте қос қабатты үйді түгел жалмап, шырт ұйқыдан шошып оянғандар жанұшыра көмек сұраған. Олардың шыңғырған дауысын жақын көршілері естіпті. Оқиға куәгерлерінің айтуынша, үй иесінің «құтқарыңдар» деп, от арасынан айғайлаған дауысы анық естілген. Оттың ортасында қалғандар жалма-жан әйнекті шаққанымен, терезедегі темір тордан шыға алмай қалған.

Үкіметтік комиссия өрттің себептері бойынша тергеу жүргізді. Көп баланың бір мезгілде қаза табуы елді толғантып, қоғамда тұрғын үй қауіпсіздігі, өрт қауіпсіздігі ережелерінің сақталуы туралы сұрақты айқын қойды.

2025 жылы ел аумағында қандай алапат өрт оқиғалары тіркелді?

12 адам мерт болған жантүршігерлік жол апаты

23 қазанда Ақтөбе облысы аумағындағы халықаралық Самара-Шымкент тасжолында, Белқопа ауылының маңында DAF жүк көлігі мен ГАЗель соқтығысқан. ГАЗель жолаушылар көлігі ресми түрде Т.Жүргенев ауылынан облыс орталығына жолаушылар тасымалдаумен айналысқан. Жүк көлігі қарсы қозғалыс жолағына шығып кеткен. Оқиға болған жерде 2 жүргізуші мен ГАЗель көлігінің 10 жолаушысы (8-і ересек, 2-уі бала) қаза тапқан, тағы 5 адам медициналық мекемеге жеткізілді.

Ішкі істер министрі тергеу барысын жеке бақылауға алды. Үкімет комиссиясы құрылды. Бір ғана жол апатында 12-ден аса адамның өмірін жоғалтуы бүкіл елді шошындырған ауыр жаңалық болды және жол қауіпсіздігі мәселесін қайтадан күн тәртібіне шығарды.

Бас прокуратураның Құқықтық статистика және арнайы есепке алу жөніндегі комитетінің деректеріне сәйкес, 2025 жылғы 1 шілдедегі жағдай бойынша елімізде 15 698 жол-көлік оқиғасы тіркелген. Апаттардан 22 346 адам зардап шегіп, олардың 955-і қаза тапты. Оның ішінде 5552 бала жарақат алып, 135 бала қайтыс болған.

(Фото: Видеокадр)

Өндірістік жазатайым оқиғалардан 77 кенші қаза тапқан

Еңбек және халықты әлеуметтік қорғау министрлігі (2025 жылғы 1 шілдедегі жағдай бойынша) мәлім қылғандай, өндірістегі жазатайым оқиғалардан 584 жұмыскер зардап шегіп, оның 77-сі қаза тапқан.

Жарақат алу бойынша Қарағанды облысында – 61 адам, ШҚО-да – 50 адам, Павлодар облысында – 44 адам, Атырау облысында – 40 адам, Ақтөбе облысында – 39 адам, Алматы қаласында 51 адам зардап шеккен. Экономика салалары бойынша ең көп зардап шеккендер тау-кен металлургия кешенінің өнеркәсіптерінде – 18,1 % және құрылыс саласында – 9,2%.

Жазатайым оқиғалардың болуының негізгі себептері: өндірістегі жұмыстың тиісті деңгейде ұйымдастырылмауы (34,6%), жәбірленушінің абайсыздығы (32,9%), жол қозғалысы ережелерін бұзу (8,6%), еңбек қауіпсіздігі және еңбекті қорғау ережелерін бұзу (7,1%).

Еңбекті қорғау фактілерінің бұзылушылықтары бойынша құқық қорғау органдарына жазатайым оқиғаларды тергеудің 439 материалы жіберіліп, соның негізінде 139 қылмыстық іс қозғалды.

Сондай-ақ 17 ақпанда Ұлытау облысындағы Жомарт кенішінде 7 кеншінің қазасы жұрттың қабырғасын қайыстырды.

(Фото: sputnik.kz)

Сонымен қоса, әйелдер мен балаларға қатысты зорлық-зомбылықтың кейбір жағдайлары адам өлімімен аяқталды. Бұл істер қоғамда үлкен ашу туғызды. Құқық қорғау органдарының, әлеуметтік қызметтердің рөлі сынға алынды. Мұндай оқиғалар – қорғау тетіктері болғанымен, бірақ олар кейде кеш іске қосылатынын, зорлық-зомбылық – тек қылмыс емес, жүйелік әлеуметтік проблема екенін көрсетіп отыр.

Оған қоса, жасөспірімдер мен жастар арасында суицид пен ауыр психологиялық дағдарыс оқиғалары тіркелді. Суицид оқиғалары қоғамға ерекше ауыр болатын себебі, бұл – бір күнде болатын апат емес, ұзақ жиналған ішкі күйзелістің салдары. Әрбір жағдай – бір отбасының өмір бойғы жарасы. Өз-өзіне қол жұмсау оқиғалары – психологиялық көмекке қолжетімділік жеткіліксіздігін және мектеп пен қоғамда эмоциялық денсаулық әлі де екінші қатарда екенін көрсетті.

Соңғы жаңалықтар