2025 жылы 246 мыңнан астам адам әлеуметтік төлемақы алған

Отбасының цифрлық картасы жобасының бір жылда көрсеткен нәтижесі осы.  

Жоба бірнеше мемлекеттік органның ақпараттық жүйесін интеграциялау арқылы қазақстандықтардың әлеуметтік портретін құрады. 

Бір сөзбен айтқанда, ақпараттық платформа азаматтарға тиісті әлеуметтік көмек көрсетуге арналған. Жүйеде 6 млн 200 мың отбасы, немесе 20 млн тұрғынның мәліметтері сақталған. Отбасының цифрлық картасы қазақстандықтардың қай жәрдемге мұқтаж екенін автоматты түрде анықтайды. Бұдан кейін тағайындалатын әлеуметтік қолдау туралы СМС хабарлама жібереді. Осылайша тұрғындардың қандай да бір мемлекеттік органға жүгінбей-ақ, қашықтан жәрдемақы рәсімдеуге мүмкіндік береді. 

Cонымен былтыр 1414 нөмірінен 463 мың 300 адамға әлеуметтік жәрдемақы не төлем тағайындау жайлы хабарлама жіберілген. Нәтижесінле 246 мың 400 қазақстандық тиісті төлемақысын рәсімдей алған. Ал енді отбасының цифрлық картасы аясында мемлекеттен қандай  көмек қарастырылған? Экрандағы мәліметтерге мұқият үңілсек, бірқатар әлеуметтік қолдаудың енгенін көреміз. 

Мәселен, азамат жұмысқа жарамсыз деп танылса, жұмыстан шығып қалса, немесе асыраушысынан айырылса, мұндай жағдайда үкімет бұны деректер базасынан біліп, сырттай жәрдемақы тағайындайды. Сонымен бірге баланы дүниеге әкелу, мүгедектігі бар баланың күтімі және мүгедектік берілген кезде автоматты түрде әлеуметтік қолдау көрсетіледі. «Алтын» және «Күміс алқалы» көп балалы аналар, атаулы әлеуметтік көмекке мұқтаждар да цифрлық карта бойынша бірден анықталады. Жерлеуге арналған біржолғы жәрдемақы тағайындау да дәл осы жоба бойынша жүзеге асырылады.