Отбасының цифрлық картасы: 246 мыңнан астам адамға мемлекеттік қызмет көрсетілді

Еңбек және халықты әлеуметтік қорғау министрлігінің мәліметінше, Отбасының цифрлық картасы (ОЦК) Қазақстандағы барлық мемлекеттік ақпараттық жүйелерден жинақталған деректер негізінде қалыптасады. Қазір онда 20 млн-ға жуық азамат және 6,2 млн-нан астам отбасы туралы ақпарат бар, деп хабарлайды Egemen.kz.

Фото: Ашық дереккөз

2025 жылдың басынан бері әлеуметтік-еңбек саласындағы мемлекеттік қызметтерді проактивті көрсету үшін 463,3 мың адамға SMS-хабарлама жолданған. Осының нәтижесінде 246 мыңнан астам адам өтініш бермей-ақ жәрдемақы мен әлеуметтік төлемдер алған.

Қазіргі таңда ОЦК арқылы азаматтар өтініш бермей-ақ 11 түрлі әлеуметтік төлемді ала алады. Олар:

Еңбек ету қабілетінен айырылған жағдайда төленетін төлем; Жұмысынан  және асыраушысынан айырылған жағдайда берілетін көмек; Бала туу мен күтіміне және мүгедектігі бар баланы тәрбиелеп отырған ата-анасына (қамқоршысына) төленетін жәрдемақы; Мүгедектігі бойынша және көпбалалы отбасыларға берілетін жәрдемақы; «Алтын алқа» және «Күміс алқамен» марапатталған көпбалалы аналарға берілетін жәрдемақы; Атаулы әлеуметтік көмек, сондай-ақ жерлеуге арналған біржолғы төлем.

Сонымен қатар, ОЦК зейнетақы төлемдері, «қандас» мәртебесі берілген немесе ұзартылған жағдайлар, жұмыссыз азаматтар үшін жұмыспен қамту шаралары туралы автоматты хабарламалар жіберуді іске асырды.

«Мемлекеттік қолдау шараларын алуға құқық белгіленген кезде әлеуетті алушыға 1414 бірыңғай байланыс орталығынан SMS-хабарлама жіберіледі. Хабарлама алған азамат оған келісімі туралы жауап беруі керек. Өтінішті ресімдеу және әлеуметтік жәрдемақы немесе төлем тағайындау автоматты режимде жүргізіледі, содан кейін ақша қаражаты алушының банк шотына аударылады», делінген хабарламада.

Алаяқтық тәуекелдерін болдырмау үшін 1414 нөмірінен келген хабарламаға ғана жауап беру қажет. Барлық сұрақтар бойынша 1414 Call-орталығына тегін қоңырау шалуға болады.