2026 жылы үй алу жеңілдей ме? Үй алғысы келетіндерге жақсы жаңалық мәлім болды

2026 жылы да қазақстандықтар үшін баспана алуға мүмкіндік беретін бірқатар мемлекеттік ипотекалық бағдарламалар жұмысын жалғастырады. Krisha.kz дерегінше, келер жылы қолжетімді болатын негізгі бағдарламалар мен олардың шарттары белгілі бола бастады, деп жазады Arasha.kz.

"Наурыз" бағдарламасы

Отбасы банк мәліметінше, "Наурыз" ипотекалық бағдарламасы кемінде 2031 жылға дейін жалғасады. 2026 жылға арналған өтінім қабылдау мерзімі нақты бекітілмегенімен, көктем айларында басталуы ықтимал.

Бағдарлама шарттары бойынша:

пайыздық мөлшерлеме – 9%; әлеуметтік осал топтар үшін – 7%; алғашқы жарна: таза әрлеудегі пәтерге – 10%, қара әрлеудегі тұрғын үйге – 20%.

Несие сомасының шекті көлемі:

Астана мен Алматыда – 36 млн теңгеге дейін; өзге өңірлерде – 30 млн теңгеге дейін.

Қарыз мерзімі – 19 жыл. Биыл бұл бағдарламада бір орынға орта есеппен төрт адам үміткер болған.

"Наурыз жұмыскер"

"Наурыз жұмыскер" бағдарламасы да алдағы алты жыл бойы сақталады. Ол өнеркәсіп, көлік, ауыл шаруашылығы, энергетика және су ресурстары салаларында еңбек ететін азаматтарға арналған.

Ипотеканың шарттары негізгі "Наурыз" бағдарламасымен бірдей. Жаңа өтінімдер 2026 жылдың көктемінде қабылданады деп күтілуде.

"7-20-25" ипотекасы

Мемлекеттік "7-20-25" ипотекалық бағдарламасы 2026 жылы да жалғасады. 5 қаңтарда бұл бағдарламаға 25 млрд теңге көлемінде жаңа транш бөлінбек.

Бағдарлама шарттары:

пайыздық мөлшерлеме – 7%; алғашқы жарна – 20%-дан бастап; несие мерзімі – 25 жылға дейін.

Максималды несие сомасы өңірлерге қарай белгіленген:

Астана, Алматы және маңындағы елді мекендер, сондай-ақ Ақтау, Атырау, Шымкентте – 30 млн теңге; Қарағандыда – 25 млн теңге; басқа өңірлерде – 20 млн теңге.

Айта кетейік, 2025 жылы несие лимиттері ұлғайтылған болатын.

Әйелдерге арналған "Ұмай" ипотекасы

"Ұмай" әйелдер ипотекалық бағдарламасы 2025 жылы іске қосылады деп жоспарланғанымен, басталмай қалды. Қазіргі болжам бойынша, бұл бағдарлама 2026 жылы қайта іске қосылуы мүмкін. Алайда қаржы көлемі мен нақты мерзімі әлі жарияланған жоқ.

Алдын ала мәліметтерге сәйкес:

пайыздық мөлшерлеме – 14,4%; кейін 3,5-5% дейін төмендеуі мүмкін; алғашқы жарна – 15-20%; қарыз мерзімі – 25 жылға дейін; несие сомасы – 50 млн теңгеге дейін. "Жасыл ипотека"

"Жасыл ипотека" – энергия үнемдейтін әрі экологиялық талаптарға сай тұрғын үйлерді сатып алуға арналған арнайы бағдарлама. Мұндай баспаналар LEED, BREEAM, ГОСТ немесе OMIR сертификатына ие болуы тиіс.

2025 жылы бұл бағдарлама аясында 570 несие рәсімделіп, жалпы көлемі 14,7 млрд теңгені құраған. 2026 жылы да "жасыл" ипотека беру жалғасады.

Бағдарлама шарттары:

несие сомасы – 50 млн теңгеге дейін; алғашқы жарна – 20%-дан бастап (тұрғын үй төлемдерін алатындар үшін – 15%); пайыздық мөлшерлеме – 12,5%, қарыздың 50%-ы жиналған соң пайыз 3,5-5% дейін төмендейді.

"Жасыл ипотека" арқылы пәтер алуға болатын тұрғын үй кешендерінің тізімі Отбасы банкінің ресми сайтында жарияланған.