“3020 метр биіктікте“ шетелдік турист Алматы тауларында адасып кетті

Алматы тауларына кезекті саяхат құтқарушыларды шақыртумен аяқталды. БАӘ-нен келген турист адасып, қайтар жолды таба алмай қалған, деп хабарлайды Tengri Travel.

Видео

Төтенше жағдайлар министрлігі Telegram-арнасында түнде "Бүркіт ұясы" сарқырамасы маңында БАӘ-нен келген турист жоғалып кеткенін хабарлады. Оған құтқарушылар көмекке келді.

"Өткен түні Алматының Медеу ауданында, 3020 метр биіктіктегі "Бүркіт ұясы" сарқырамасы маңында Мониторинг және жедел әрекет ету орталығының құтқарушылары таудан түсіп келе жатып бағытынан адасқан БАӘ азаматына көмек көрсетті", - деді ТЖМ.

Құтқарушылар туристі таудан тауып алып, қауіпсіз жерге дейін ертіп келді, оны туыстары күтіп алды. Медициналық көмек қажет болмады.

ТЖМ кеңесі

ТЖМ тауға шығар алдында келесі ережелерді сақтау қажеттігін тағы да еске салады:

маршрутты алдын ала зерттеу; ауа райы жағдайын ескеру; жақындарыңызға жорық туралы ескерту; таңбаланған соқпақтардан шықпау.

Сарапшылар бұған дейін де ескерткен: егер бірнеше күндік маршрут жоспарласаңыз, бұл туралы ТЖД (112) немесе ТЖМ-ге хабарлау қажет.

Сонымен қатар мамандар тауға шығар алдында ескеру керек пайдалы кеңестерін бөлісті:

жолға жалғыз шықпаңыз; киім мен аяқ киімді ауа райы жағдайына және маршруттың ерекшелігіне қарай таңдаңыз. Алыстан жақсы көріну үшін ашық түсті киімдерге басымдық берген абзал; жылы киім, алғашқы көмек қобдишасын, қолшам, пауэрбанк және термос алыңыз; жорық басталғанға дейін топтың барлық қатысушысын суретке түсіріп алыңыз.

Алматы ТЖД күрделі әрі бірнеше күндік маршруттар үшін кәсіби нұсқаушының көмегіне жүгінген дұрыс екенін еске салады. Бір күнде бірнеше қашық нүктені аралауды жоспарламаған жөн - бағытты өз физикалық мүмкіндіктеріңіз бен ауа райына қарай таңдау керек. Сондай-ақ жоспарланған жолдан ауытқымау және көру аймағында қалатын жерлерді таңдау ұсынылады.

Егер адасып кетсеңіз, сабыр сақтап, үрейге бой алдырмау маңызды. Топтан қалып қойып, оның мүшелерімен байланыса алмасаңыз, 112 нөмірі бойынша құтқарушыларға қоңырау шалып, мүмкіндік болса, оларға өз координаттарыңызды жіберу қажет.

Орналасқан орныңызды жібергеннен кейін сол жерден кетпеу керек. Кейін байланыс үзілсе немесе телефон сөніп қалса да, құтқарушылар соңғы алынған координаттарды негізге алып, іздеуді сол нүктеден бастайды.

Алматы ТЖД мәліметінше, жыл басынан бері құтқарушылар тауға 250-ден астам рет шыққан. Тоғыз айға жуық уақыт ішінде 380-нен астам туристке көмек көрсетілді, оның ішінде 100-ден астамы бала. 60-тан астам адам түрлі жарақат алды.

Салыстырмалы түрде: былтыр құтқарушылар 410 рет шыққан. Ол кезде 600-ден астам туристке көмек қажет болған, оның ішінде 88 бала бар, ал 69 адам жарақат алған.

Тағы оқыңыз: Түркияда турист шағаланы ұстап алды: оқиғаға қатысты СІМ пікір білдірді

Google News арқылы жаңалықтарымызды қадағалаңыз

Жазылу