400 ден астам жасанды интеллект агенті әзірленді олардың негізгі мақсаты қандай

АСТАНА, 18 тамыз – Sputnik. AI-Sana бағдарламасы аясында 440-тан астам ЖИ-агент әзірленді. Бұл туралы ғылым және жоғары білім министрі Саясат Нұрбек мәлімдеді, деп хабарлайды Sputnik Қазақстан тілшісі.

Қазіргі кезде жоғары білім саласын цифрландыруға ерекше көңіл бөлініп келеді. Негізгі міндет – студент университетке түскен күннен бастап диплом алғанға дейінгі барлық негізгі процесті бір жүйеге біріктіру. Бүгінде ҰБТ сертификаты eGov жүйесінде қолжетімді, AI-прокторинг және AI-Talapker іске қосылған.

Ал студенттер мен түлектер туралы негізгі деректер жоғары білім берудің бірыңғай платформасында жинақталады. Ендігі кезекте AI-Admission, AI-Onboarding, жеке білім беру траекториясы, цифрлық құзыреттер профилі, AI-Library, AI-психолог және AI-Career секілді ЖИ-шешімдерді оқу процесіне енгізу жоспарланған.

"Бұл бағытта бастапқы база қалыптасты. AI-Sana бағдарламасы аясында 440-тан астам ЖИ-агенттер әзірленді. Алдағы оқу жылында бағдарламаның 3-ші және 4-ші кезеңдері жүзеге асырылады", - деді Нұрбек үкіметтің бүгінгі отырысында.

Айта кетері, Astana Hub сұранысқа ие IT мамандықтарын меңгеруге арналған бағдарламасына өтінім қабылдауды бастаған болатын. Соның аясында қатысушылар офлайн форматтағы оқу үшін 500 000 теңгеге дейін, ал онлайн немесе гибридті форматтағы оқу үшін 400 000 теңгеге дейін номиналды ваучер ала алады.