46 миллиард теңге: күдіктілер бүкіл ақшаны қылмыстық жолмен зейнетақы жинағынан шығарып алған

Стоматологиялық қызмет көрсету үшін БЖЗҚ-дан қаражат шығару ісі бойынша кәсіпкер Аслан Дүйсеновтің Қаржы мониторингі агенттігінің кәсіпкерге неліктен іздеу жариялағаны айтылды. Бұл туралы Қаржылық мониторинг агенттігі төрағасының орынбасары Жеңіс Елемесов сенат кулуарында түсіндірді, - деп хабарлайды Аikyn.kz.

Оның айтуынша,  тергеу органы оның төрт емхана құруға қатысу фактілерін толық дәлелдеген.

"Біріншіден, ол – күдікті. Оған сырттай айып тағылды, сот оны уақытша қамауға алу туралы шешім шығарды. Оған іздеу жарияланды. Бүгінгі таңда ол ұсталды, сот санкцияны күшінде қалдырды. Ал түскен сомалар тергеуде толық анықталды", - деді Жеңіс Елемесов.

Айтар болсақ, Қаржылық мониторинг агенттігі БЖЗҚ-дан 46 млрд теңгені заңсыз шығарды деп күдікке ілінген үш адамға іздеу жариялаған.  Олар – Аслан Дүйсенов, Ғаббас Иманбаев және Есімхан Елешев. Аталған азаматтар 46 млрд теңгеден астам қаражатты БЖЗҚ-дан заңсыз шығару мақсатында қылмыстық схема ұйымдастырды деген күдікке ілінген.

Ал бұған дейін Қаржы мониторингі агенттігі желідегі ресми парақшасында жалған емханалар мен 226 дроппер арқылы БЖЗҚ-дан 200 млрд теңге жымқырылғанын мәлім етті. ҚМА өкілдері істер бойынша тәркіленген мүліктерді көрсетті. Агенттік дерегіне сүйенсек, күдіктілер салымшылардың ақшасына құны 600 млн теңгеден асатын 15 элиталық көлік сатып алған, одан бөлек брендтік зергерлік бұйымдар, сонымен қатар коммерциялық үй-жайлар, пәтерлер мен жер учаскелері тәркіленген.